Gatsibo:Umukozi arakekwaho kwica nyirabuja

3

Umukozi uzwi nka Mutabazi wakoraga akazi ko mu rugo kwa Nsanzimfura Vedatse mu gasantere ka Kabarore mu Karere ka Gatsibo arakekwaho kwivugana umufasha wa Nsanzimana amunigiye mu bwogero mu gitondo cyo kuri uyu wa Mbere.

Amakuru y’urupfu rw’uwo mubyeyi Gaudence Uwihoreye yemejwe na IP Emmanuel Kayigi, Umuvugizi wa Polisi mu Ntara y’Iburasirazuba ubwo yaganiraga na The NewTimes.

Nsanzimfura yatangaje ko yabyutse ajya ku isambu yabo mu rukerera rwo kuwa Mbere, agasiga umugore we aryamye.

Ubwo yagarukaga yabajije aho umugore we ari, umwana wabo w’imyaka ine amubwira ko atameze neza.Mutabazi yahise atanguranwa abeshya Nsanzimfura ko umugore we yarwaye bitunguranye akajywanwa ku kigo nderabuzima.

Ubwo yageraga ku kigo nderabuzima, yasanze umugore adahari, agaruka yihuta kureba mu rugo.Akigera mu rugo yasanze umugore we Uwihoreye ahambiriye ikiziriko mu ijosi ari mu bwogero aziritse amaboko yapfuye, Mutabazi we yari yamaze kugenda.

Nsanzimfura kandi yasanze iduka rye ryibwe ndetse na bimwe mu bikoresho byo mu rugo nka telefone byibwe, ahita atangira gukeka ko umukozi we Mutabazi ariwe wabikoze.

Ubuyobozi bw’inzego z’ibanze buvuga ko uwo mukozi nta ndangamuntu yagiraga, ndetse ngo n’abakoresha be izina bari bazi ni Mutabazi gusa.

Umwe mu bana baturanye n’uwo muryango yabwiye Radiyo Rwanda ko Mutabazi yari aherutse kuvuga ko aziba telefone ya Uwihoreye, iyo yari amaze iminsi aguriwe n’umugabo we ibihumbi ijana.

Umurambo wajyanywe ku bitaro bya Kiziguro ngo husuzumwe icyishe Uwihoreye, mugihe iperereza naryo rikomeje.

Yisangize Inshuti.

Ibitekerezo 3

Tanga Igitekerezo