Gasabo: Inzu ya Pasteur Bizimungu wigeze kuba Perezida w’u Rwanda yafashwe n’inkongi y’umuriro

Mu gitondo cyo kuri uyu wa kane tariki 11 Kanama 2016, inyubako ya Pasteur Bizimungu wigeze kuyobora u Rwanda, mu gice cy’ahari ububiko bw’ahakorera ikigo gikora ibijyanye n’ubuhinzi cya IFDC (International Fertilizer Development center) iherereye ku Kimihurura, yibasiwe n’inkongi y’umuriro.

Nkuko abari aho ubwo iyi nkongi yabaga babivuzengo ishobora kuba yatewe n’abakozi basudiriraga hafi ya Moteri itanga amashanyarazi bityo ngo bikaba bishoboka ko ibishashi byaba byayigezeho ubundi igafatwa n’umuriro.

Umwe mu bakozi b’iki kigo waganiriye na Makuruki.rw yavuze ko hangiritse ibintu byinshi binyuranye harimo impapuro nyinshi, za mudasobwa, karitushe n’ibindi byinshi bitandukanye, yakomeje avuga ko batazi agaciro k’ibyangiritse bityo bakaba bakeka ko byagera muri miliyoni 500 bitewe n’ibikoresho byinshi kandi by’agaciro byari bibitse muri ubu bubiko.

Umuvugizi wa polisi mu mujyi wa Kigali ACP Hitayezu Emmanuel yavuze ko iyi nkongi yatangiye mu masaha ya saa tatu, ibicyekwa kuba byangirikiye muri ubu bubiko bikaba birimo mudasobwa, n’ibindi bikoresho byo mu biro biturutse ku bikorwa byo gusudira byakorerwaga hafi n’ububiko bw’iki kigo.

Yagize ati: " Ibikekwa kuba byahiriye muri iyi nzu ni machine za laptops(mudasobwa) n’ibindi bikoresho byo muri office[....] twamenyeko hari ibikorwa bijyanye no gutunganya inzu, muri ibyo bikorwa harimo n’ibyo gusudira akaba aribyo bikekwaho kuba intandaro y’iyi nkongi y’umuriro yafashe stock y’iyi nzu."

Umuvugizi wa Polisi yavuze ko nta gaciro k’ibyangirikiye muri iyi nkongi kazwi bityo bakaba batangiye iperereza ngo hamenyekane nyir’iyi nzu, agaciro k’ibyangiritse ndetse n’icyaba cyihishe nyuma y’iyi nkongi y’umuriro yafashe ububiko bw’ikigo IFDC.

ACP Hitayezu yasabye abafatanyabikorwa ba Polisi kujya batangira amakuru ku gihe,kandi abakora ibikorwa byo kubaka bakajya bakoresha ibikoresho byujuje ubuziranenge ndetse n’abakozi babihuguriwe.

Umuvugizi wa polisi mu mujyi wa Kigali yatangaje ko mu iperereza riri gukorwa nibasanga uwakoraga ibi bikorwa byo gusudira afite uruhare mu guteza iyi nkongi azashyikirizwa inzego zibishinzwe.


Abapolisi b’urwego rushinzwe kuzimya inkongi bahise batabara


Inkongi yibasiye cyane igice cy’ububiko bwa IFDC


Bimwe mu bikoresho bitafashwe n’inkongi byari birunze hanze


Polisi yageragezaga kuzimya n’ubwo umuriro wari mwinshi


Bateruraga bimwe mu bikoresho bitafashwe n’inkongi


Kizimyamwoto zifashishijwe mu kuzimya umuriro

Umwe mu basudiraga ukekwaho guteza iyi nkongi


John Veerkamp umuyobozi wa IFDC

Jean Louis Uwishyaka

Makuruki.rw

Amafoto/ Mugemanyi Jean Paul

Yisangize Inshuti.

Ibitekerezo

Tanga Igitekerezo