Gasabo: Abantu babiri bahiriye mu nzu abaturanyi babo bijundika abanyerondo

2

Abaturage batuye mu mudugudu wa Muhororo, Akagari ka Kagugu, mu Murenge wa Kinyinya, akarere ka Gasabo, banenze bikomeye abashinzwe umutekano muri uwo mudugudu uburyo babatereranye ubwo babatabazaga mu gihe inzu y’umuturanyi wabo yari ifashwe n’inkongi y’umuriro mu rukerera rwo kuri uyu wa gatanu ariko bakabura uwabatabara.

Ahagana mu ma saa kumi z’igitondo cyo kuri uyu wa 24 Kamena 2016, inzu yabagamo umugabo witwa Nzayisenga Onesme, umugore we n’abana babiri, yibasiwe n’inkongi y’umuriro maze ibintu byose byari biyirimo birashya birakongoka, umugore n’umwana na bo barakomereka bikomeye.

Nzayisenga Onesme yabwiye Makuruki.rw ko bari baryamye maze akumva ibintu biri guturika mu nzu, maze ngo mu kureba abona n’umuriro ari nabwo ngo yatabazaga abaturanyi be.

Abaturage baturanye n’uyu muryango wagize ibyago nabo ngo bihutiye gutabara ariko ngo umuriro wari wamaze kuba mwinshi bitewe na moto yari iri muri iyo nzu. Gusa ngo batangiye gutobora inzu kugira ngo barokore abari bari guhiramo byanatumye basanga umugore n’umwana muto bamaze gushya bikomeye.

Umuturage witwa Ignace uri mu batabaye mbere yavuze ko bagerageje guhamagara irondo byibuze ngo bajyane inkomere kwa muganga ariko bagatinda kuza dore ko ngo abanyerondo bahageze saa kumi n’ebyiri za mu gitondo umuriro wamaze kuzima, ibintu bavuga ko byabababaje kandi bishyura amafaranga y’umutekano.


Moto yari muri iyo nzu yahiye irakongoka

Yagize ati “Abaturage twatabaye tuhahurira n’umukuru w’umudugudu duhamagara abanyerondo turababura bahageze mu gitondo bwakeye.”

Uyu mugabo yongeyeho ko ibi byatumye batwara umwana kwa muganga mu ntoki, gusa ngo nabwo bamugejeje ku kigo nderabuzima babura imbangukiragutabara barinda bamutwara kuri moto, kimwe na nyina wari wanegekaye.

Undi Muturage witwa Mutesi Angelique we ashyira amakosa ku banyerondo avuga ko badakora ngo kuko bagombaga kuhagera kare bagafatanya n’abandi kuzimya iyo nkongi ndetse n’imodoka igatwara inkomere kwa muganga batabatwaye kuri moto.

Yagize ati “Abanyerondo bahageze bukeye, ubuse amafaranga dutanga ni ay’iki? Imodoka y’irondo na yo yari kuza ikabajyana kwa muganga, ariko ntayaje iza gusa iyo ije gusenya no gutwara abantu twagira ibyago ntize.”

Nyir’urugo Nzayisenga Onesme we nta cyo yabaye cyane kuko yabashije gushohoka mbere kimwe n’umwana we kuri ubu bakaba bacumbikiwe n’abavandimwe basengana mu gihe we ari gushakisha uko umuryango we uri kuvurirwa mu bitaro bya CHUK wavurwa.


inzu yahiye irarangira

Umuyobozi w’Umurenge wa Kinyinya Kayihura Felix yemeje iby’iyi nkongi avuga ko yatewe n’insinga z’amashyanyarazi ndetse ko abakomerekeyemo bagiye kwa muganga.

Kayihura kandi yakomeje ahakana ko irindo ryatereranye uyu muryango kuko ngo imbaraga z’abanyerondo atari zo zari zikenewe cyane kugira ngo umuriro uzime, naho imodoka y’irindo yo ngo ikaba yarapfuye.

Yagize ati “Abanyerondo batandatu bari kuza bagakora iki? Icyari gikenewe ni uko abaturage batabara bose. Imodoka y’irondo yo yarapfuye iri mu igaraje uretse n’abacu n’abahandi turabatwara ntabwo twakwanga kubatwara.”

Nzayisenga Onesme wari usanzwe ari umumotari yabwiye Makuruki.rw ko yizejwe n’ubuyobozi bw’inzego z’ibanze ko hari icyo buzamufasha mu muganda rusange uteganijwe kuba ku munsi w’ejo ku wa gatandatu.


Imashini umugore yadodeshaga nayo yakongotse


Abaturage barinze gusenya inzu kugira ngo barokore umugore n’abana bari barimo

Yisangize Inshuti.

Ibitekerezo 2

  1. Ohh birababaje
    😣 😣 none mwaba mwabashije kudukurikiranira uko bamerewe?

  2. Ohh birababaje
    😣 😣 none mwaba mwabashije kudukurikiranira uko bamerewe?

Tanga Igitekerezo