Ubu dukoreshe inyundo ku rushishi?- ACP Rangira

1

ku bemera Bibiliya, hari aho Imana ibaza Yeremiya iti ‘Mbese ijambo ryanjye ntirimeze nk’umuriro, cyangwa nk’inyundo imenagura urutare?’ aha yashakaga kumvikanisha uburemere bw’inyundo ya yindi itera umusumari, cyangwa kinubi imenagura urutare.

Mu nama y’inteko rusange y’umugi wa Kigali yahuje abayobozi bo mu nzego z’ibanze, Umuyobozi wa Polisi mu mujyi wa Kigali, ACP Rangira Bosco, yavuze ko abahungabanya umutekano n’abigira ibyihebe bataragera kure ku buryo icyemezo cya nyuma ari ukuburasa kuko ngo byaba ari ukwicisha inyundo inshishi.

Ibi yabitangaje kuri uyu wa 29 Kanama 2016 mu Nteko rusange yari yahuje abayobozi batandukanye muri mujyi wa Kigali, ubwo umuturage witwa John Mukama wo mu mudugudu wa Kimironko yasabaga ko hakwiye gukoreshwa amasasu mu kurandura imyitwarire y’ubuhezanguni itangiye kugaragara mu Rwanda.

Mukama yagize ati “Mfite ingingo imwe numvaga itinjiye cyane muri aba baturage bose uko turi hano, ingingo ifatanye no kurwanya iterabwoba ntabwo yaducengeye mukuyisobanura. Nasabaga ko Polisi yatanga ‘Message’ buri wese ubigerageje nta kujya mu nkiko ngo ajye kugora umunyamategeko,ahubwo isasu rikavugira aho.”

ACP Rangira Bosco, uhagarariye Polisi mu mujyi wa Kigali mukumusubiza, yavuze ko hari inzira nyinshi zo guhashya abahungabanya umutekano n’abakora iterabwoba.

Yagize ati “Ntabwo birananirana, amasasu ngira ngo murabizi ko ahenda akora iyo byananiranye, byari byananirana? hari inzira nyinshi. Urushishi ushobora kurukubita inyundo, ushobora kurusyonyora, ushobora kurukubita igiti, rero dukoreshe inyundo ku rushishi? Ariko nabijeje yuko kiriya kibazo kidatera kabiri, Amasasu akora iyo bibaye ngombwa ntabwo ari ugupfa kuyatumura ku nshishi.”

ACP Rangira avuga ko bitaraba ngombwa ko amasasu akoreshwa ahubwo hagikenewe ubufatanye abahungabanya umutekano bagahashywa.

JPEG - 146.7 kb
Minisitiri Kaboneka n’abayobozi batandukanye mu mujyi wa Kigali

Minisitiri Kaboneka yavuze ko u Rwanda rutazigera rujenjekera abahungabanya umutekano wagezweho nyuma ya Jenoside yakorewe Abatutsi kuko ariwo rukesha ibindi byose rugenda rugeraho imbere mu gihugu no ku ruhando mpuzamahanga.

Ubutumwa nkubu kandi buherutse kugarukwaho na Jenerali Mubaraka Muganga, uyobora ingabo mu mujyi wa Kigali, aho yavuze ko afitiye impamba ikomeye abashaka gusenya amajyambere igihugu cyagezeho.

Yagize ati “Abantu bagezeho kuko bareba nk’inzu aho gutekereza kubaka indi akumva yayijya munsi igaturika,. Abo impamba mbafitiye irenze iya babandi bashikuza amasakoshi.”

Nta minsi myinshi ishize mu Rwanda hadutse ibikorwa by’ubuhezanguni aho mu bice bitandukanye benshi bagiye bafatwa bagafungwa abandi bakaraswa bashaka kurwanya no gutoroka inzego z’umutekano.

JPEG - 151.1 kb
Abayobozi batandukanye mu nzego z’ibanze mu mujyi wa Kigali

@Eric Birori

Yisangize Inshuti.

Ibitekerezo 1

  1. rwose kurasa sumutekano kko mbona byatuma nababikora bazajya bazishaka ugasanga bibaye urugamba nabo bakazajya bitegura guhangana nkuko tubibona mubindi bihugu inama nukwigisha abanyarwanda ko aribibi naho abarasa nabanu nabaraswa nabanu numva ntamuti

Tanga Igitekerezo