Burundi: Abantu 3 bahitanywe na Gerenade mu gace Perezida avukamo

Abantu batatu bitabye Imana bahitanywe na grenade yaturikiye mu Ntara ya Ngozi mu majyaruguru y’u Burundi kuri uyu wa kabiri tariki ya 14 Kanama 2016, agace kanavukamo umukuru w’igihugu cy’u Burundi Pierre Nkurunziza.

Iyi gerenade yaturikiye ahantu hakunda guparika amagare hafi y’ishuri ribanza rya Ngozi 4.

BBC dukesha iyi nkuru ivuga ko umwe mu bantu bapfuye harimo n’umusirikare wari ufite amagerenade abiri, imwe ikaba ari na yo yaturitse.

Amakuru kandi avuga ko bitaramenyekana niba ari igitero cyagabwe cyangwa niba ari impanuka kuko uyu musirikare ngo yari agiye ku kazi ndetse ngo mbere y’uko gerenade iturika ngo uyu musirikare akaba yumviswe avuza induru.

Iki kinyamakuru gikomeza kivuga ko ejo ku wa mbere hari indi gerenade yari yaturikiye muri zone Kanyosha iri mu mujyi wa Bujumbura.

Kugeza ubu igipolisi cy’u Burundi nta cyo kiravuga kuri iki gitero.

Kuva mu Burundi hatangira imvururu zakurikiye ukwiyamamaza kwa Perezida Nkurunziza, hakunze kumvikana impfu zinyuranye aho abantu batari bake bagiye bicwa, aho muri abo harimo n’abasirikare bakuru b’icyo gihugu.

Imvururu zimaze umwaka urenga zimaze guhitana abantu barenga 500 naho abarenga ibihumbi 250 bakaba barahunze bava mu byabo, bajya mu bihugu by’amahanga birimo n’u Rwanda.

Yisangize Inshuti.

Ibitekerezo

Tanga Igitekerezo