Burundi: Abantu batatu barimo abanyamakuru batawe muri yombi

Pierre Nkurikiye,Umuvugizi wa Polisi y’u Burundi

Mu gihugu cy’u Burundi abanyamakuru babiri hamwe n’umushoferi wabo batawe muri yombi n’urwego rushinzwe umutekano bashinjwa gufotora batabiherewe uruhushya n’ubuyobozi.

Kuri iki cyumweru tariki 23 Ukwakira 2016 ni bwo abanyamakuru babiri, umunyamerika kazi Julia Steers ufite icyicaro i Nairobi n’umurundi Gildas Yihundimpundu batawe muri yombi.

Aba banyamakuru bose hamwe n’umushoferi wabo bahaswe ibibazo, gusa umunyamerika Julia akaba yaje kurekurwa nyuma y’amasaha atandatu, naho Gildas n’umushoferi bajyana guhatwa ibibazo n’urwego rushinzwe iperereza mu Burundi.

Julia Steers yabwiye RFI iby’itabwa muri yombi ryabo ati " Guhera saa mbili z’iki gitondo(Ku cyumweru) twagiye gufata amafoto ku mibereho y’abaturage batuye mu gace ka Mutakura. Byadufashe iminota 20 turiyo, ubwo twari tumaze gufata amashusho ni bwo abashinzwe umutekano bahagaritse imodoka yacu ndetse bafunga umuhanda, bari barakaye ndetse bakomeza kutubaza mu kirundi icyo twakoraga hariya."

Yakomeje agira ati "Bahadufungiye ku gihe kigera ku isaha nyuma Polisi iraza, abashinzwe gukora iperereza ndetse n’abakorera ibiro bishinzwe itangazamakuru baza kureba niba dufite ibyangombwa, nari kumwe na Gildas umunyamakuru w’umurundi dukunze gukorana akaba n’umunyamakuru wa BBC. Nawe yatawe muri yombi ajyanwa mu biro bishinzwe gukora iperereza kimwe n’umushoferi wacu witwa Pascal utari uzi n’ibyo ari byo."

Ngo Polisi yavuze ko Gildas atari yanditse mu banyamakuru bagize inama y’igihugu y’itangazamakuru, gusa ngo ntibanatanze impamvu yatumye bamuta muri yombi.

Ati " Ntibashakaga ko ngumana nawe ahubwo bakomezaga kuvuga ko byose ari ku mpamvu z’u Burundi. Mfite impungenge, ntekereza ko nta mpamvu bafite yatumye bata muri yombi bariya bantu babiri."

Nk’uko umuvugizi w’igipolisi cy’u Burundi Pierre Nkurikiya yabitangaje ngo Julia Steers yarekuwe nyuma yo kumvwa n’abakozi b’ibiro bishinzwe itangazamakuru (CNC) bagaragaza ko yari afite ibyangombwa by’agateganyo bimwemerera gukorera mu Burundi.

Kugeza ubu Gildas Yihundimpundu n’umushoferi wari ubatwaye baracyari mu maboko y’urwego rushinzwe gukora iperereza mu Burundi nyuma y’aho CNC yemeje ko uyu munyamakuru w’Umurundi atari yanditse nk’umunyamakuru bityo bakaba bari gukora iperereza ku imvo n’imvano y’ifatwa ryabo.

CNC kandi ivuga ko abo banyamakuru, bafatiwe ahigeze gutahurwa icyobo rusange cyari gishyinguyemo abantu benshi mu bihe by’imyigaragambyo ndetse aya makuru akaba yanemejwe n’umuvugizi w’igipolisi cy’u Burundi avuga ko batigeze babimenyesha abashinzwe umutekano kuko ibyo byobo birinzwe ndetse akaba ari ibimenyetso bikomeye ku bwicanyi bwakozwe n’abigaragambyaga.

Yisangize Inshuti.

Ibitekerezo

Tanga Igitekerezo