Bugesera: Umusore yishwe atemwe akekwaho guca inyuma umugabo w’umugore

Mu ijoro ryo kuri iki cyumweru tariki 5 Kamena 2016, Umugabo witwa Nkundimana Eric utuye mu murenge wa Ntarama, akagari ka Cyugaro, mu mudugudu wa Rubomborana, yishe atemye umusore witwa Biziyaremye Tharcisse w’imyaka 29 y’amavuko amukekaho kumuca inyuma.

Amakuru atugeraho aravuga ko ibi byabaye mu ma saa mbiri n’igice z’ijoro, ubwo ngo Biziyaremye yatahaga aherekeje umugore wa Nkundimana witwa Mukakanini Priscilla ngo bari biriwe basangira inzoga ku kabari, maze mu kumugeza mu rugo ngo ni bwo yahise atemwa n’umugabo w’uyu mugore bimuviramo kuhasiga ubuzima ndetse ngo uwo mugabo akaba yaranatemye bikomeye umugore we ku gikanu, mu mutwe, ndetse no ku kuboko aramukomeretsa.

Uyu mugabo kandi ngo yanatemye mu ivi Ncunguyinka Abdone usanzwe ubakodesha inzu, ubwo yari aje atabaye nyuma yo kumva imirwano hanze y’inzu ye.

Umuyobozi w’umudugudu wa Rubomborana ubu bwicanyi bwabereyemo, Niyonzima Theogene, yatubwiye ko aho Nkundimana yari acumbitse yari afitemo akazu gato acururizamo ibintu bitandukanye birimo n’inzoga, ubwo rero ngo mbere yuko atema uwo musore ngo yabanje kwirukana abantu bose bari bari kunywera inzoga aho ngaho, ari na bwo ngo yasohokanaga umuhoro atema Biziyaremye ahita amwica ndetse anakomeretsa umugore we.

Yagize ati:”Ahantu bacumbitse bari bahafite akantu k’akabari abantu bagenda bifashisha, abantu b’abakiriya uwo mugore yahasanze n’uwo bari bazanye, uwo nyiri urugo yahise amanura utwo tuyoga twaje maze arababwira ngo munywe vuba mumvire aha ngaha mutahe, mu gutindiganya kwabo rero babona asohokanye umuhoro bumva ko ari nko gukanga abantu cyokoza barasohoka baragenda, na nyir’urugo yasohotse ahita yinjira mu nzu ye, gusa akigerayo yagiye kumva yumva umuhoro muravuga hanze agize ngo arasohoka ahita amukubita umuhoro mu ivi, yatemeye uwo musore aho ngaho.”

Uyu muyobozi yatubwiye ko uyu muryango wari umaze ukwezi kumwe muri uyu mudugudu, ariko ngo nta makimbirane bari basanzwe bazi muri urwo rugo muri icyo gihe cyose bahamaze, ndetse ngo bakaba batari basanzwe bazi iby’uyu musore n’uyu mugore, gusa yemeza ko bishoboka ko uwo mugore ashobora kuba yari asanzwe aziranye n’uwo musore kuko ngo utakirirwa usangira n’umuntu inzoga mudafitanye ubushuti.

Nyuma yo gutema Biziyaremye, ngo Nkundimana yahise aburirwa irengero, gusa ngo mu gitondo cyo kuri uyu wa mbere akaba yishyikirije inzego z’umutekano muri aka karere avuga ko ari ku bw’impamvu z’umutekano we.

Umurambo wa nyakwigendera ndetse n’uwo mugore wakomerekejwe bikomeye ngo bahise bagezwa ku bitaro bya Nyamata.

Umuvugizi wa Polisi mu ntara y’iburasirazuba IP Emmanuel Kayigi, yemereye Makuruki.rw ko ubu bwicanyi bwabaye, atubwira ko uyu musore yishwe akekwaho kuba aca inyuma Nkundimana gusa ngo nta cyemeza ibi ngibi kuko nta kimenyetso uyu mugabo atanga.

Yagize ati:" ni byo yatemye uwo musore amukeka kuko ntiyigeze abafata, ni uko gusa yabonye ko basangiye hamwe inzoga abona ko uwo musore agendana n’umugore we ari na bwo yazanaga umuhoro abahukamo aratema, mu gutema ntiyatemye uwo gusa, yatemye uwo, atema n’uwari ubacumbikiye, atema ndetse n’uwo mugore we."

IP Kayigi yavuze ko iperereza kuri ubu bwicanyi rigikomeje kugira ngo uyu mugabo akorerwe dosiye ashyikirizwe ubutabera.

IP Kayigi avuga ko abantu bakwiye kujya bamenyesha ubuyobozi ibibazo byabo baba bafite mu miryango, kugira ngo bikemurwe mbere y’uko bibyara ibibazo birimo n’ubwicanyi.

Avuga kandi ko abantu na bo bakwiye kujya batanga amakuru mu gihe babonye ingo zirimo amakimbirane kugira ngo abashe guhoshwa mu maguru mashya.

Uyu mugabo akurikiranyweho ibyaha bibiri, birimo gukubita no gukomeretsa ndetse n’icyaha cy’ubwicanyi. Amategeko avuga ko mu gihe ibi byaha byabaye impurirane, hakurikizwa icyaha gikomeye muri ibi, bivuga ko Nkundimana aramutse ahamwe n’icyaha, yahanwa hifashishijwe ingingo y’140 y’igitabo cy’amategeko ahana ibyaha mu Rwanda, aho iyi ngingo iteganya igifungo cya burundu ku muntu wishe undi abigambiriye.

Yisangize Inshuti.

Ibitekerezo

Tanga Igitekerezo