Babiri bafatiwe kugerageza guha abapolisi ruswa

1

Mu rukerera rwo ku italiki 23 Mata, abashoferi bafashwe bagerageza guha abapolisi ruswa mu gikorwa cyo kurwanya ruswa cyabereye mu kagari ka Mukoto, umurenge wa Bushoki ho mu karere ka Rulindo.

Umuvugizi wa Polisi y’u Rwanda mu Ntara y’Amajyaruguru, Inspector of Police (IP) Innocent Gasasira , yavuze ko umwe muri abo bashoferi , uri mu kigero cy’imyaka 41, yafatiwe kuri bariyeri yari yashyizweho n’inshami rya Polisi rishinzwe kurwanya ruswa(Anti-corruption unit) ,nyuma yo guha umupolisi ruswa y’amafaranga 6000 , kugirango amureke akomeze kandi atwaye imodoka ipakiye ingurube muri ayo masaha.

Aha IP Gasasira akaba agira ati:”Amabwiriza ya Minisiteri y’Ubuhinzi n’Ubworozi avuga ko bitemewe gutwara amatungo mu modoka nijoro, uyu mugabo yafashwe ari saa sita z’ijoro kandi nawe yari aziko bitemewe.”

Yakomeje agira ati:” undi we yafashwe amaze guha umupolisi ruswa y’amafaranga 4000 nyuma y’uko imodoka yari atwaye yari ipakiye ibiti nta cyangombwa kibimwemerera gitangwa n’akarere; ubu bombi bafungiye kuri sitasiyo ya Polisi ya Bushoki mu gihe iperereza ryatangiye.

IP Gasasira yasabye abaturage kudatanga no kutakira ruswa, kandi abibutsa ko iki cyaha nta mwanya gifite muri Polisi y’u Rwanda ndetse no mu gihugu muri rusange.

Yagize ati:"Polisi y’u Rwanda ntitanga serivisi ku buryo bunyuranyije n’amategeko , itanga serivisi ku buntu, ku rundi ruhande ariko, ikarwanya ndetse igakumira ibikorwa bibi bya ruswa n’ibijyana nayo ndetse n’ibindi binyuranyije n’amategeko."

IP Gasasira yagize kandi ati:” Turagira inama, abafashwe cyangwa abavandimwe n’inshuti b’umuntu ukurikiranyweho ibyaha bitandukanye cyangwa ikosa runaka kujya bategereza imyanzuro ya Polisi cyangwa izindi nzego zikorana nayo aho gutanga ruswa kugira ngo hakorwe ibinyuranyije n’amategeko kandi n’ubundi ibyo baba bafatiwe ari ibitemewe n’amategeko.”

Yakanguriye kandi abaturage kwirinda no kurwanya ibyaha muri rusange maze abasaba kujya baha Polisi y’u Rwanda amakuru ku gihe y’ikintu cyose gishobora guhungabanya umutekano.

Kurwanya ruswa biri mu byo Polisi y’u Rwanda yibandaho, akaba ari muri urwo rwego yashyizeho umutwe ushinzwe by’umwihariko kuyirwanya (Anti-Corruption Unit).

Umuvugizi wa Polisi mu Ntara y’Amajyaruguru yashoje avuga ko, Polisi y’u Rwanda , mu rwego rwo gukumira no kurwanya ruswa , yaguye ubufatanye aho ikorana n’abafatanyabikorwa barimo urwego rw’Umuvunyi, Umuryango mpuzamahanga ushinzwe kurwanya ruswa ishami ry’u Rwanda (Transparency International Rwanda) ndetse n’ikigo cy’igihugu gishinzwe imiyoborere (RGB) n’izindi nzego ..

Ingingo ya 640 y’igitabo cy’amategeko ahana y’u Rwanda ivuga ko umuntu, wese uha, ku buryo bweruye cyangwa buteruye, washatse guha undi muntu, ku buryo buziguye cyangwa butaziguye, impano cyangwa indonke iyo ari yo yose cyangwa yamugiriye amasezerano yabyo kugira ngo amukorere cyangwa akorere undi muntu ikiri mu mirimo ashinzwe cyangwa yifashishije imirimo ye, ahanishwa igifungo kuva ku myaka ibiri (2) kugeza ku myaka itanu (5) n’ihazabu y’amafaranga y’u Rwanda yikubye inshuro kuva kuri ebyiri (2) kugeza ku icumi (10) z’agaciro k’indonke yatanze cyangwa yashatse gutanga.

Yisangize Inshuti.

Ibitekerezo 1

  1. Mubyukuri ababantu batanga ruswa bagashaka no kuyiha polisi yu Rwanda ngewe mbona batagendana nigihe igihugu cyacu kigezemo, ubu aba bayobewe ko polisi yacu ifite munshingano zayo kurwanya ruswa ni bindi byaha byose. Ruswa ni imungu imunga igihugu ababantu rero bakurikiranwe namategeko nibibahama bahanwe

Tanga Igitekerezo