Babiri bafashwe bakekwaho gucuruza ibiyobyabwenge

1

Polisi y’u Rwanda ikorera mu turere twa Kicukiro mu mujyi wa Kigali na Gakenke mu ntara y’Amajyaruguru kuwa kabiri tariki ya 5 Nyakanga yataye muri yombi abantu 2 bakekwaho gucuruza no kwinjiza ibiyobyabwenge mu Rwanda.

Abafashwe ni Kubwimana Assinapol w’imyaka 45 wafatiwe mu karere ka Kicukiro afatanwa urumogi, na Sibomana Faustin w’imyaka 60 wafatanywe amapaki 11 ya Waragi n’andi 24 ya Blue Sky mu karere ka Gakenke.

Umuvugizi wa Polisi y’u Rwanda mu mujyi wa Kigali Superintendent of Police (SP) Emmanuel Hitayezu yavuze ko kugirango uyu Kubwimana afatwe ari abaturage bahaye Polisi amakuru ko acuruza urumogi, nayo ihita ijya kumufata, anavuga ko ubu abaturage bamaze kumenya ko kurwanya ibiyobyabwenge no kwicungira umutekano ari inshingano zabo, kuko ahenshi mu hafatirwa ibiyobyabwenge ari abaturage baba batanze amakuru .

Yashimiye abaturage batanze amakuru yatumye uyu mugabo afatwa anabakangurira kwirinda kwishora mu kunywa no gucuruza ibiyobyabwenge kuko bibagiraho ingaruka.

Akaba yagize ati:”Ibiyobyabwenge ni bibi kuko biteza ubukene mu miryango, kuko uwabinyoye ntakora ahubwo apfusha ubusa ibyagateje umuryango imbere abigura ibiyobyabwenge kandi binamwangiriza ubuzima ndetse ubifatanywe abicuruza cyangwa abinywa agafungwa .”

SP Hitayezu yasabye abaturage gukomeza kugira ubufatanye na Polisi y’u Rwanda, batangira amakuru ku gihe y’abacuruza ibiyobyabwenge n’abakora ibindi byaha ngo bafatwe bataragera ku mugambi wabo. Yabakanguriye kandi kwibumbira mu mashyirahamwe no kwitabira gahunda zindi Leta yashyizeho zo guteza mbere imibereho yabo.

Aba bagabo bahamwe n’icyaha bahanishwa gufungwa kugera ku myaka itatu nk’uko bikubiye mu ngingo ya 594 yo mu gitabo mpanabyaha cya Repubulika y’u Rwanda.

Yisangize Inshuti.

Ibitekerezo 1

  1. †Ibiyobyabwenge ni bibi kuko biteza ubukene mu miryango, kuko uwabinyoye ntakora ahubwo apfusha ubusa ibyagateje umuryango imbere abigura ibiyobyabwenge kandi binamwangiriza ubuzima ndetse ubifatanywe abicuruza cyangwa abinywa agafungwa .â€

Tanga Igitekerezo