Amajyepfo: Batatu bafunzwe bakekwaho kwiba mudasobwa mu mashuri

Abagabo batatu bafungiwe mu turere twa Gisagara na Nyanza bakurikiranyweho kwiba mudasobwa ngendanwa 46.

Abafashwe ni umuyobozi wa Groupe Scolaire Gatagara mu karere ka Nyanza aho mudasobwa 35 zo muri gahunda ya One Laptop per Child zaburiwe irengero.

Umuvugizi wa Polisi mu Ntara y’Amajyepfo CIP André Hakizimana atangaza ko gufatwa k’uwo muyobozi gufitanye isano n’ibura rya mudasobwa nibura 548 zaburiwe irengero mu bigo by’amashuri 53 mu Ntara y’Amajyepfo nyuma y’igenzura ryakozwe n’ikigo cy’igihugu gishinzwe uburezi REB.

Iri genzura ryagaragaje ko hanabuze bimwe mu bice bya mudasobwa birimo utwuma babikaho ibyakozwe(memory cards) 1498, batiri zazo 173 , utwo bakoresha bashyiramo umuriro(chargers) 56

CIP Hakizimana yagize ati:” Iyi ni intangiro y’iperereza ; tuzakomereza mu bindi bigo zabuzemo kugirango ababifitemo uruhare bose babiryozwe kandi zigaruke.”

Avuga ku bya G.S Gatagara, CIP Hakizimana yagize ati:” Uwo muyobozi ufungiye kuri sitasiyo ya Polisi ya Busasamana, niwe ukekwa kuko iperereza rigaragaza uruhare rwe.”

Hagati aho, mu karere ka Gisagara naho hafashwe mudasobwa 10 muri 11 zari zibwe muri Kansi Secondary School muri cyumweru gishize, nk’uko iperereza ryerekanye.

Abantu babiri barimo umunyeshuri wiga mu mwaka wa gatanu kuri icyo kigo n’umuzamu wacyo w’imyaka 35, ubu nabo barafunze.

Aba bombi , bikekwa ko mu ijoro ryo ku wa 16 Ukwakira bamennye aho ziba maze bazitwara zose.

CIP Hakizimana agira ati:” Bwarakeye ishuri ritanga ikirego kuri Polisi , uwaketswe wa mbere ni umuzamu, ari nawe wari waharaye, uyu yahise afatwa.”

Yagize kandi ati:”Nyuma gato, habaye inama n’ababyeyi ndetse n’abatuye muri aka gace ngo batange amakuru kuri izi mudasobwa kuko zifitiye akamaro abana babo. Nyuma gato y’inama, umukecuru w’imyaka 81 yahamagaye umuhungu we w’umukuru w’umudugudu, amubwira ko hari hari umunyeshuri wabitse ibintu mu nzu ye; baje kureba basanga ni za mudasobwaq zabuze aribwo uwo munyeshuri yatawe muri yombi n’umufuka yari yazibiyemo.”

Yisangize Inshuti.

Ibitekerezo

Tanga Igitekerezo