Abatuye intara y’Iburasirazuba basabwe guhanahana amakuru ku kurwanya ibyaha ndengamipaka

Umuyobozi wa Polisi mu ntara y’Iburasirazuba Assistant Commissioner of Police (ACP) Emmanuel Karasi, yavuze ko nk’intara ihana imbibi n’ibihugu bitatu aribyo Uganda, Tanzaniya n’u Burundi, kurwanya ibyaha ndengamipaka muri iyo ntara bishingiye ku guhanahana amakuru.

ACP Karasi yavuze ko ibyaha ndengamipaka bikunda kuboneka mu ntara y’Iburasirazuba ari ubujura bw’amatungo na za moto, ndetse n’icyaha cy’ubucuruzi bw’abantu n’ubwo cyo kidakunze kuhagaragara cyane.

Aha yagize ati:”Bimwe mu byaha nk’ibyo, bitahurwa na Polisi igihe iri mu kazi kayo ka buri munsi, ariko kandi tunifashisha amarondo y’abaturage aho rimwe na rimwe afata abanyabyaha batarambuka imipaka. Ababa barangije kwambuka twifashisha ababa baduhaye amakuru ndetse na bagenzi bacu bo mu zindi nzego z’umutekano kugirango tubafate.”

Umuyobozi wa Polisi mu ntara y’Iburasirazuba yakomeje avuga ko uretse ibyo bikorwa mu kurwanya ibyaha mu ntara ayobora, banagirana inama buri gihembwe na bagenzi babo bo mu bihugu bihana imbibi n’iyi ntara, bagafatira hamwe ingamba zo gukomeza kubungabunga umutekano w’imipaka y’ibihugu byabo.

Yavuze ati;’Ibikorwa Polisi y’u Rwanda iha agaciro n’intara y’Iburasirazuba ibiha agaciro, niyo mpamvu natwe tuzi ko imikoranire myiza ari ingenzi mu mikorere ya Polisi muri iki gihe. Ntidushobora kurwanya ibyaha ndengamipaka tudakoranye na bagenzi bacu bo mu bihugu duturanye. Niyo mpamvu rero tugirana nabo inama za buri gihembwe, tugahanahana amakuru y’icyashobora guhungabanya umutekano ku mpande zose.”

RPC Karasi yavuze kandi ko ibyinshi mu byaha biboneka muri iyo ntara ari ibiterwa n’imipaka itemewe hagati y’ibyo bihugu bahana imbibi, ikaba ikunda gukoreshwa n’abanyabyaha bayinyuzamo ibiyobyabwenge nka Kanyanga n’inzoga zitemewe hano mu Rwanda.

Yakomeje avuga ko uturere dukunda guhura n’ibibazo nk’ibyo ari Nyagatare ihana imbibi na Uganda, Bugesera na Ngoma zihana imbibi n’u Burundi, na Kirehe ihana imbibi na Tanzaniya.

Yanavuze kandi ko amapfa amaze igihe kirekire muri aka karere yagize ingaruka ku buhinzi n’ubworozi nayo yateye umutekano mucye, ndetse n’ubuto bw’umuhanda wa Kaburimbo ukoreshwa n’imodoka nini zituruka muri Uganda na Tanzaniya, bikaba byatera impanuka zo mu muhanda.

Ku byerekeranye n’umutekano rusange mu ntara y’Iburasirazuba, umuyobozi wa Polisi muri iyo ntara yavuze ko uhari, ko igisigaye ari ukugumya kuwumbatira.

Yagize ati;”Nubwo dufite umutekano ariko, hari ibyaha bimwe na bimwe birimo impanuka zo mu muhanda, bikaba bibangamiye umutekano muri iyi ntara. Kuva muri Mutarama kugera muri Gicurasi uyu mwaka, muri iyi ntara hagaragayemo ibyaha 1994 bitandukanye, 71,3% byabyo byose bikaba ari ikoreshwa n’icuruzwa ry’ibiyobyabwenge, gukubita no gukomeretsa, ubujura no gusambanya abana.”

Yakomeje agira ati;”Bimwe muri ibyo byaha biri ku isonga nk’ibiyobyabwenge na Kanyanga bivanwa muri Tanzaniya na Uganda ababikora bakabifashwamo n’imipaka itemewe banyuramo.”

Yavuze ko kurwanya ibi byaha ndengamipaka babikesha ahanini imikoranire ya Polisi n’abaturage aho yagize ati;” Gahunda y’imikoranire ya Polisi n’abaturage ihuza izo nzego zombi kandi ikagira uruhare runini mu kugera ku mahoro n’umutekano, kuko abaturage nibo bagena umutekano… Tuzakomeza dukorane neza nabo, ndetse n’abandi bafatanyabikorwa, twese turwanyirize hamwe ibyaha byakorwaga muri iyi ntara, dukomeze ubukangurambaga, ariko ibi byose bigomba gushingira ku cyizere abaturage bazagirira Polisi yabo.”

ACP Karasi yavuze kandi ko Polisi y’u Rwanda mu ntara y’Iburasirazuba igira uruhare mu bikorwa biteza imbere imibereho y’abaturage b’iyo ntara, birimo kubagabira inka muri gahunda ya Gir’inka, gahunda Vision 2020 Umurenge (VUP) n’izindi gahunda.
Yanavuze ko Polisi yagize uruhare rukomeye mu kurwanya malariya, kwita ku bidukikije n’ibikorwa by’umuganda.

Yavuze ati;” Umutekano ntiwaboneka igihe abaturage badafite ubuzima bwiza cyangwa bakennye, niyo mpamvu dufatanya n’inzego z’ibanze mu kuzamura imibereho myiza y’abaturage b’intara y’Iburasirazuba.”

ACP Karasi yasoje ashimira iyo mikoranire iri hagati ya Polisi n’abaturage, abibutsa ko umutekano ariwo shingiro ry’iterambere, bikaba bisaba ko buri wese agira uruhare mu kuwugeraho.yanabibukije kandi ko mu rwego rwo kugirango guhanahana amakuru n’abaturage, Polisi y’u Rwanda ifatanyije n’ubuyobozi bw’intara y’Iburasirazuba yashyizeho umurongo utishyurwa ariwo 5767 ngo bajye bisanzura mu gutanga amakuru.

Yisangize Inshuti.

Ibitekerezo

Tanga Igitekerezo