Abasirikare barenga 750 basezerewe mu mirimo mu cyubahiro

1

Abasirikare bagera kuri 775 barimo abakuru n’abato mu ngabo z’u Rwanda, baserewe mu cyubahiro mu mirimo yabo, aho mu basezerewe harimo abagiye mu kiruhuko cy’izabukuru ndetse n’abasezerewe ku mpamvu z’uburwayi.

Minisiteri y’ingabo itangaza ko uyu muhango waraye ubaye kuri uyu wa 11 Nyakanga 2016, wayobowe na Minisitiri w’ingabo Gen James Kabarebe, ukaba wanitabiriwe n’abasirikare bakuru ndetse n’abagore b’abasezerewe.

Mu basirikare bakuru basezerewe kubera izabukuru barimo Lt General Ceaser Kayizari, Maj Gen Sam Kaka, Maj Gen Frank Mugambage, Maj Gen Paul Rwarakabije na Brig Gen George Rwigamba uyobora urwego rw’igihugu rushiznwe imfungwa n’abagororwa (RCS).

Gen James Kabarebe yashimiye aba basirikare bakuru umusanzu wabo mu kubohora u Rwanda no guhagarika Jenoside yakorewe Abatutsi.

Gen James Kabarebe yagize ati “Mu izina ry’umugaba mukuru w’ingabo w’ikirenga, ndashimira abasezerewe uyu munsi kubera izabukuru ku bwitange bwabo mu rugamba rwo kubohora igihugu no kugiteza imbere. Mwese mwaritanze kugira ngo u Rwanda rube ahantu dutewe ishema no kwita iwacu.”

Lt Gen Ceaser Kayizari wavuze mu izina ry’aba basirikare basezerewe, yashimiye ubuyobozi bw’ingabo z’u Rwanda, umugaba mukuru w’ikirenga Perezida Kagame by’umwihariko ku nama n’indangagaciro yabahaye mu rugendo rw’akazi ka gisirikare.

Ati “Twagendanye urugendo rurerure rw’ingenzi, twarwanye hamwe nk’ikipe, dufitanye igihango na RDF yatureze ikatwubaka, aho tuzajya hose ntituzabatenguha.”

Minisiteri y’ingabo ivuga ko ibirori nk’ibi byo gusezerera abandi ba ofisiye n’abasirikare bato mu mapeti byagiye bibera muri za unity zabo.

Kuva mu 2013, iyi ni inshuro ya kane RDF ishyize mu kiruhuko cy’izabukuru abasirikare n’abakozi bayo.

Muri uyu mwaka, abasirikare 371 barimo ab’amapeti mato n’abakuru bagiye mu kiruhuko cy’izabukuru, abakozi 353 bari abafite amasezerano y’akazi asanzwe na RDF, naho abagera kuri 51 basezerewe mu ngabo kubera uburwayi.

Aba basirikare basezerewe mu mirimo n’Inama y’Abaminisitiri iherutse guterana ku wa gatanu w’icyumeru gishize, gusa ntiyari yatangaje amazina y’abagomba gusezererwa.


Maj Gen Frank Mugambage ashimirwa akazi katoroshye yakoreye igihugu

Yisangize Inshuti.

Ibitekerezo 1

  1. Nibyiza guse zekeka umunu ushaje mukazi alikose nanone abobose base zeleye nuko bose basha ka gutaha

Tanga Igitekerezo