Abagabo 3 bafatanywe insinga z’amashanyarazi bibye muri Nyanza na Rubavu

Polisi y’u Rwanda irakangurira Abaturarwanda kwirinda kwangiza ibikorwa remezo nyuma y’uko mu turere twa Rubavu na Nyanza abagabo bafatanywe insinga z’amashanyarazi bibye.

Mu cyumweru gishize nibwo polisi y’u Rwanda yafashe aba bagabo 3 yabafatanye insinga z’amashanyarazi zireshya na metero 350; bakaba bakekwa kuba barazibye Sosiyete itunganya ikanatanga serivisi z’ingufu z’amashanyarazi (Energy Utility Corporation Limited- EUCL) baziciye ku byuma zari zihambiriyeho.

Abazifatanywe ni Hategekimana Jean Bosco ufungiwe kuri Sitasiyo ya Polisi ya Kanama (Rubavu); akaba akekwaho kwiba izireshya na metero 300 mu kagari ka Terimbere, mu murenge wa Nyundo; babiri bandi ni Ntezirizaza Sadi na Niyibizi Jean Claude; aba bombi bakaba bafungiwe kuri Sitasiyo ya Polisi ya Busasamana (mu karere ka Nyanza) nyuma yo gufatirwa mu kagari ka Gatagara, mu murenge wa Mukingo bafite insinga z’amashanyarazi zireshya na metero 50 bakekwa kwiba ahantu hataramenyekana.

Uko ari batatu bafashwe barimo gushaka abaguzi b’izo ntsinga z’amashanyarazi.

Umuvugizi wa Polisi y’u Rwanda mu Ntara y’i Burengerazuba, Chief Inspector of Police (CIP) Theobald Kanamugire yavuze ko Hategekimana yafashwe ku itariki 27 z’uku kwezi amaze kugurisha metero 112 muri 300 akekwa kuba yaribye mu ijoro ryo ku wa 26 Kanama uyu mwaka.

Yagize ati,"Abo yagurishije izo metero 112 bari bumvikanye ko bamwishyura ibihumbi 150 by’amafaranga y’u Rwanda; ariko babaga batarayamuha. Mu gihe yarimo ashaka abandi baguzi; bamwe mu bazimubonanye bahamagaye Polisi bayimenyesha ko babonye umuntu bakeka ko yaba yibye insinga za EUCL. Polisi yahise iza irazimufatana."

Ntezirizaza na Niyibizi na bo bafashwe barimo gushaka abaguzi b’insinga bakekwa kuba baribye mu kagari ka Gatagara mu ijoro ryo ku itariki 25 z’uku kwezi nk’uko bitangazwa n’Umuvugizi wa Polisi y’u Rwanda mu Ntara y’Amajyepfo, Inspector of Police (IP) Emmanuel Kayigi.

Aba bombi bafashwe biturutse ku makuru yatanzwe n’abababonanye izo nsinga z’amashanyarazi.

Mu butumwa bwe CIP Kanamugire yagize ati, ","Ibikorwa remezo bifitiye akamaro abaturage n’igihugu muri rusange. Kubyangiza cyangwa kubyiba bigira ingaruka ku iterambere muri rusange. Ni yo mpamvu buri wese agomba kugira uruhare mu kubirinda no kubibungabunga."

Abavugizi ba Polisi muri izi Ntara basabye abazituye kwirinda ibyaha aho biva bikagera no gukora nezaamarondo kugira ngo babikumire; kandi bagatanga ku gihe amakuru atuma hafatwa ababikoze.

Uko ari batatu nibahamwa n’icyaha bazahanishwa igifungo kuva ku myaka ibiri (2) kugeza ku myaka itanu (5) n’ihazabu y’amafaranga yikubye inshuro kuva kuri ebyiri (2) kugeza ku nshuro icumi (10) z’agaciro k’ibyangijwe nk’uko biteganywa n’ingingo ya 406 yo mu gitabo cy’amategeko ahana ibyaha mu Rwanda.

Yisangize Inshuti.

Ibitekerezo

Tanga Igitekerezo