Umutekano n’isuku ntibitandukanywa bigomba kuba umuco - Meya Mukaruliza

Umuyobozi w’umujyi wa Kigali Mionique Mukaruliza arasaba abanyarwanda kubungabunga umutekano ndetse no kugira isuku mu mibereho yabo ya buri munsi bitewe n’uko ngo ibi byombi bijyana nta gisiga ikindi.

Ibi yabitangaje ubwo Polisi y’u Rwanda n’umujyi wa Kigali, kuri uyu wa gatandatu tariki ya 2 Nyakanga 2016, batangizaga icyiciro cya gatandatu cy’ubukangurambaga muri gahunda y’isuku n’umutekano mu mujyi wa Kigali.

Iki cyiciro cyatangirijwe kuri sitade ya Kigali I Nyamirambo, kigamije guhuriza hamwe abafatanyabikorwa batandukanye gushyira imbaraga mu kugira uruhare mu kubungabunga umutekano n’isuku.

Ubu bukangurambaga bwatangijwe n’umuyobozi w’umujyi wa Kigali Mukaruliza Monique n’umuyobozi mukuru wa Polisi y’u Rwanda (IGP) Emmanuel K. Gasana.

Umuyobozi w’Umujyi wa Kigali Mukaruliza Monique mu ijambo rye, yavuze ko hari ibintu bibiri umujyi wa Kigali urusha indi mijyi myinshi muri Afurika no ku isi, ari byo umutekano n’isuku.

Yakomeje ashimira Polisi y’u Rwanda ubufatanye bwihariye ifitanye n’Umujyi wa Kigali, aho yavuze ko umuntu ufite umutekano bituma atekereza neza, nawe agatera imbere.

Yavuze ko isuku igomba gutangirira ku muntu ku giti cye, mu ngo, ku myambaro no ku mubiri ndetse n’aho abantu bakorera ku buryo abazahembwa bazaba babikoreye. Yavuze ko ari isuku n’umutekani bibangikanye kuburyo kimwe kidatandukana n’ikidi.

Yavuze ati;”Umutekano n’isuku ntibitandukanywa, tukaba tugomba gushyiramo imbaraga ku buryo byaba umuco kuri buri munyarwanda.”

Meya Mukaruliza yashimiye Nyakubahwa Perezida wa Repubulika Paul Kagame, ukora uko ashoboye kose ngo umutekano n’isuku bibe umuco mu Rwanda.

Umuyobozi wa Polisi y’u Rwanda IGP Emmanuel K. Gasana yavuze ko isuku n’umutekano aribyo shingiro ry’iterambere, anavuga ko iki gikorwa cyo gukangurira abantu isuku n’umutekano kigamije gukemura ibibazo bitandukanye igihugu kiba gifite, kandi ko biifite n’ aho bihuriye n’icyerekezo cy’igihugu mu bijyanye n’iterambere

Yakomeje avuga ko muri iki gikorwa cyo guharanira isuku n’isukura, Polisi y’u Rwanda igenera ibihembo buri murenge witwaye neza muri buri karere k’umujyi wa Kigali.

IGP Gasana yabwiye abari bateraniye aho ko bashyira imbaraga mu kurwanya impanuka zo mu muhanda, ibiyobyabwenge n’ibisindisha, amakimbirane yo mu ngo n’ihohoterwa rikorerwa abana, ubujura, ruswa n’ibindi byaha.

Uyu muhango kandi wari wanitabiriwe n’uhagarariye amashami y’umuryango w’abibumbye akorera mu Rwanda Lamin M. Manneh.


Abaturage basabwe kugira isuku no kubungabunga umutekano


Abatwara ibinyabiziga bibukijwe ko bagomba kwirinda impanuka

Yisangize Inshuti.

Ibitekerezo

Tanga Igitekerezo