Eng. SAGASHYA Didier ni we munyamabanga Nshingwabikorwa mushya w’Umujyi wa Kigali

Eng Didier Sagashya wigeze kuba Umuyobozi Mukuru w’Ikigo cy’igihugu gishinzwe imyubakire (Rwanda Housing Authority) ni we watsindiye kuba Umunyamabanga Nshingwabikorwa w’Umujyi wa Kigali aho asimbuye Matabaro Jean Marie wanditse asaba guhagarika akazi mu gihe kitazwi, umwanya yari amazeho imyaka 7.

Nyuma y’isezera rya Matabaro Jean Marie, Umujyi wa Kigali washyize uyu mwanya ku isoko, aho amakuru agera kuri Makuruki.rw ari uko ikizami cy’abahataniraga uyu mwanya cyakozwe kuri uyu kane tariki 16 Gashyantare 2017, aho Engenieur Sagashya Didier ari we watsindiye uyu mwanya ku manota 83,60%, umwanya yahataniraga na Rubunda Emmaboled wagize amanota 64,20%

Bikaba byari biteganyijwe ko ku gicamunsi cyo kuri uyu wa gatanu 17/02 ari bwo inama njyanama iterana ikamwemeza burundu nkuko biteganywa n’amategeko ndetse hagakorwa n’ihererekanyabubasha.

Engenieur Sagashya Didier kuva muri Kamena 2015 yabaye Umuyobozi mukuru w’ikigo cy’igihugu gishinzwe imyubakire (Rwanda Housing Authority), mbere yaho yakoze mu kigo cy’igihugu gishinzwe umutungo kamere ari umuyobozi mukuru wungirije ushinzwe ishami ry’ubutaka no kububarura (Lands and Mapping Department).

Eng. Sagashya ni we kandi wari umuyobozi wa sosiyete ya Ultimate Concepts Limited, yari ishinzwe gukurikirana imirimo yo kubaka inyubako ya Kigali Convention Center na Radisson Hotel kugeza zitashywe muri Nyakanga 2016.

Eng Didier Sagashya ni inzobere mu bijyanye n’ubwubatsi. Afite impamyabumenyi y’icyiciro cya gatatu cya Kaminuza mu bijyanye n’imitunganyirize y’imijyi n’ibyaro (Urban and Regional Planning ) yakuye muri Kaminuza ya Heriot-Watt University – Edinburgh mu Bwongereza.

Ni amaraso mashya yiyongera mu yandi mu mujyi wa Kigali

Engenieur Sagashya Didier yinjiriye rimwe mu Mujyi wa Kigali na Meya mushya w’Umujyi wa Kigali Nyamulinda Pascal watowe nawe kuri uyu wa gatanu, bakaba ari abagabo bakwitegwaho impinduka muri uyu mujyi, ukurikije ibigwi bibari inyuma by’imirimo bagiye banyuramo kandi itoshye.

Sagashya umwe mu bagize uruhare mu mirimo y’ibarura n’iyandika ry’ubutaka ikintu cyari kigoye, tutibagiwe n’uburyo imirimo yo gusoza inyubako ya Kigali Convention Center na Radisson Hotel, yitezweho impinduka mu micungire y’Umujyi cyane cyane mu ishyirwa mu bikorwa by’igishushanyo mbonera cy’Umujyi wa Kigali dore ko bijyanye n’ibyo asanzwe yaraminujemo.

Meya mushya Nyamulinda Pascal uzwiho kuba yarayoboye umushinga w’irangamuntu akawugeza ku rwego rw’ikigo gihamye gishinzwe irangamuntu (NIDA), nyuma yo gutorwa yavuze ko hari ubunararibonye azifashisha mu kwihutisha gahunda z’iterambere na serivise mu mujyi wa Kigali.

Inkuru bijyanye: Nyuma y’uko Mukaruliza akuwe ku buyobozi bw’ Umujyi wa Kigali, na Gitifu yasabye guhagarika akazi

Yisangize Inshuti.

Ibitekerezo

Tanga Igitekerezo