Kigali: Siporo kuri bose ’Car Free Day’ yashyizwe ku cyumweru cya kabiri cya Nzeli

Kubera inama nyafurika ku ishoramari iteganyijwe kubera i Kigali mu cyumweru gitaha, igikorwa cya Car Free Day cyari giteganyijwe kuba ku cyumweru cya mbere cy’ukwezi kwa Nzeli kimuriwe tariki 11 Nzeli. 2016.

Byatangajwe mu itangazo ubuyobozi bw’umujyi wa Kigali bwashyize hanze kuri uyu wa Gatatu.

Impamvu yo kwimura amatariki y’iki ikorwa byatewe n’inama nyafurika ku ishoramari izaba ibera i Kigali ku nshuro yayo ya kane, ikazaba mu cyumweru gitaha bityo abazitabira iyi nama bakazaba bari gukoresha imihanda isanzwe ikoreshwa ku munsi wa Car free day.

Nk’uko byagiye bigenda muri car free day zabanje, n’iyi iteganyijwe muri Nzeli izatangira saa moya kugeza saa sita.

Imihanda izaba ifunze guhera kuri Stade Amahoro-Gisementi-Gishushu-MINIJUST- amasangano ya Ninzi Hill Hotel -KBC-Kabindi-Rwanda Revenue Authority-Sopetrad -Amasangano yo mu mujyi rwagati kugeza kuri Car Free Zone.

Abazitabira Car free day baturuka mu bice bya Remera na Kimironko bazahurira kuri Stade Amahoro naho abaturuka mu bice byo Mujyi rwagati,Kiyovu na Nyamirambo bazahurira ahazwi nko kuri Car free zone mu mujyi rwagati.

Abazava mu duce twa Kacyiru bazahurira kuri Ninzi Hill Hotel mugihe abazava mu duce twa Gikondo bazahurira ku masangano yo mu Kanogo, aba bose bakazakomereza kuri parikingi ya Rwanda Revenue Authority.

Iyi mihanda ikurikira niyo izakoreshwa n’ibinyabiziga:

Abava mu bice bya Kimironko bazakoresha imihanda: Kibagabaga-Nyarutarama-SOS Kacyiru-Kinamba-Muhima-Mu mujyi cyangwa Nyabugogo

Umuhanda Controle Technique -RDB -Nyarutarama- SOS Kacyiru-Kinamba-Muhima-Mu mujyi cyangwa Nyabugogo

Abazava mu bice bya Remera bazakoresha umuhanda: Prince House-Rwandex-Kanogo-Kiyovu-Mu mujyi cyangwa umuhanda wa Kanogo-Nyabugogo.

Abazava mu bice bya Kicukiro bajya Kacyiru bazakoresha umuhanda: Kabeza-Giporoso-Controle Technique-Nyarutarama-SOS-Kacyiru cyangwa umuhanda wa Sonatubes-Rwandex-Kanogo-Kinamba-Kacyiru.

Mu gihe hitegurwa igikorwa cya Car free day itaha Meya wungirije w’umujyi wa Kigali Busabizwa Parfait arashishikariza abaturage kumenya agaciro ka Car free day.

Yagize ati: " Car free day ifite imimaro itatu. Icya mbere ni akamaro ku buzima, intego yacu ni ukugira umujyi ufite ubuzima aho abaturage bakora siporo, dutegura kandi uburyo bwo gufasha abaturage kwipimisha ku buntu ngo bamenye uko ubuzima bwabo buhagaze.Ku nshuro ya gatatu abaturage barenga 8000 baripimishije.

Icya kabiri ni inyungu ku bidukikije kuko bigabanya ibyuka bisohorwa n’amamodoka, icya gatatu ni inyungu ku mibanire kuko abaturage b’umujyi wa Kigali barahura bakaganira, imiryango iva mu mazu yabo bakiruka n’ibirenge cyangwa bagakoresha amagare. bishimira ibihe byabo nta bwoba bafite ko bagongwa n’ikinyabiziga."

Visi meya Busabizwa kandi yatangaje ko hari na gahunda yo gukangurira iki gikorwa mu turere. Mu gihe kiza uturere tukazajya tugira igihe cyatwo cyo gutegura Car free day.

Yisangize Inshuti.

Ibitekerezo

Tanga Igitekerezo