Amashami abiri akomeye yabarizwaga muri Polisi yakuwemo agirwa inzego zigenga

Minisitiri Sheikh Musa Fazil Harerimana na Minisitiri Busingye baganira n’abanyamakuru

Ishami ry’Ubugenzacyaha n’ishuri rikuru rya gipolisi byabararizwaga muri polisi y’u Rwanda byakuwemo bijyanwa mu muri Minisitiri y’ubutabera bigirwa ibigo biri mu nshingano za Minisiteri y’Ubutabera bikaba ari mu rwego rwo kubiha ingufu.

Amavugurura ajyanye no gukura ishami ry’ubugenzacyaha ndetse ishuri rya gipolisi muri polisi y’u Rwanda, yemerejwe mu nama y’abaminisitiri idasanzwe yateranye kuri uyu wa 10 Kanama 2016 aho hashyizweho ikigo cy’igihugu gishinzwe Ubugenzacyaha Rwanda Investigation Bureau (RIB) yahoze ari CID na Rwanda Law Enforcement Academy, ishuri rihugura abapolisi n’abanyamategeko.

Mu kiganiro n’abanyamakuru kuri uyu wa 11 Kanama 2016, Minisitiri w’Ubutabera Johnston Busingye akaba ari nawe uzajya ureberera iki kigo cya Rwanda Investigation Bureau, yavuze ko ibi byakozwe mu rwego rwo guhindura imikorere nk’uko u Rwanda ruri gutera imbere bityo ko nta kidasanzwe cyabaye.

Yagize ati "Uko igihugu cyacu kigenda gitera imbere, uko iminsi igenda yicuma, gahunda gifite, aho gishaka kugana, aho gishaka kugera, icyo twita middle income economy dushaka kubaka, hari ibintu byinshi no kuva mbere byagiye byubakwa mu nzego za Leta mu rwego rwo kuzubakira ubushobozi, mu rwego kunoza uburyo zikorana n’ibyo zikora, ibi ndabivuga kugira ngo nihajya haba ikintu cyahindutse abantu bajye babyuma muri uwo murongo ntibatekereze ko hari igitangiye kitari gisanzwe."

Minisitiri w’Umutekano mu gihugu, Sheikh Musa Fazil Harerinama, we yavuze ko kuba ubugenzacyaha bwakorwaga n’abapolisi ubwabo byateraga imbogamizi kuko byagoraga umupolisi gukurikirana mugenzi we, ariko ubu bikaba bigiye gukemuka.

Yagize ati "Turebe nk’umupolsi wakoze icyaha, ugasaba polisi gukurikirana umupolisi wakoze icyaha murumva hatarimo ikibazo? Ariko ubugenzacyaha buri ku ruhande."

Abakozi bazajya bakora muri iki kigo cya RIB bazaba ari abasivili badafite aho bahuriye n’igipolisi ndetse bakazajya baba bagengwa n’amategeko asanzwe agenga abakozi ba Leta mu Rwanda.

Iki kigo kizaba gifite inshingano zirimo kugenza ibyaha, gushyikiriza amadosiye ubushinjacyaha no kwakira amakuru ku cyaha agakorerwa ubusesenguzi.

Polisi y’u Rwanda izajya ifata abantu batungiwe agatoki n’uru rwego cyangwa se ifate abanyabyaha bari mu cyuho gusa ndetse hakazanashyirwaho amasaha ntarengwa igomba kumarana uwafashwe.

Ikigo cya Rwanda Law Enforcement Academy nacyo kizajya cyigwamo n’abapolisi n’abasivili biga ibijyanye n’amategeko.

Biteganyijwe ko umushinga ushyiraho ibi bigo byombi uzabanza kugezwa mu Nteko ishinga amategeko kugira ngo ubanze wemezwe n’abayigize.

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo