Uwari umushinjacyaha wa FDLR yatashye mu Rwanda

Maj. Karemera Innocent wari umushinjacyaha wa FDLR

Kuri uyu wa Gatanu, tariki 15 Nyakanga 2016, ni bwo Maj. Karemera wari umushinjacyaha wa FDLR muri Kivu y’Amajyaruguru, yari ageze mu Rwanda aherekejwe n’abandi barwanyi bane bavuye muri FDLR Foca.

Amakuru dukesha Kigali Today aravuga ko ageze mu Rwanda yavuze ko yitandukanyije n’umutwe w’iterabwoba wa FDLR agataha mu gihugu cyamubyaye nyuma yo gusanga nta terambere yiteze muri FDLR uretse ibibazo by’ingutu.

Yagize ati “Natangiye gutekereza gutaha kuva muri Gicurasi uyu mwaka kubera ibibazo byari muri FDLR yacitsemo ibice, imiryango mpuzamahanga yabakuyeho amaboko kandi barimo kugabwaho ibitero ubutitsa. Mpisemo kwitahira mu gihugu cyanjye.”

Maj. Karemera avuga ko tariki ya 10 Nyakanga 2016 ari bwo yavuye aho yakoreraga abana na Brig. Gen. Ntawunguka Pacifique (uzwi ku mazina ya Gen. Omega) uyobora Segiteri ya Kivu y’Amajyaguru maze yerekeza Tongo ahari ibiro bya MONUSCO, imuzana Goma.

Maj. Karemera ntiyatashye wenyine ahubwo yazanye n’abandi bari kumwe muri FDLR.


Uru ni urutonde rw’abandi barwanyi ba FDLR batahukanye na Maj. Karemera n’imiryango yabo

Yatangaje kandi ko FDLR ayisize nta ngufu ifite uretse kwisubiranamo ndetse ngo bakaba batanorohewe n’imwe mu mitwe iri kubagabaho ibitero harimo Mai Mai utaretse n’ingabo za Congo FARDC na MONUSCO bakomeje kubibasira.

Maj. Karemera ashishikariza n’abandi barwanyi asize gutaha mu gihugu cyabo aho kugwa mu mashyamba ya Congo badafite icyo barwanira kuko ababayobora babakoresha mu nyungu zabo. Yasabye Abanyarwanda asanze kumwakira nk’Umunyarwanda uje kubaka igihugu cye ntibamugireho ikibazo.

Karasira Peter wari umurinzi mu basirikare ba Brig. Gen. Omega, avuga ko gucikamo ibice byatumye FDLR ita imbaraga yari afite ku buryo abarwanyi benshi bari ku ruhande rwa Col. Wilson Irategeka wari umuyobozi wungirije Gen. Maj. Rumuli ariko ubu wigumuye.

Karasira avuga ko abarwanyi benshi bashaka kujya kwa Col. Wilson kuko ashaka gucyura impunzi no guharanira uburyo bataha naho Gen. Rumuli we ngo akaba afite gahunda yo kugumana impunzi no kuziheza mu mashyamba.

Yisangize Inshuti.

Ibitekerezo

Tanga Igitekerezo