Urwego rw’Umuvunyi rwaremye agatima abasabwe ruswa n’abatekamutwe barwiyitiriye

Urwego rw’Umuvunyi rurahamagarira abantu bose bagizweho ingaruka n’ibikorwa by’abatekamutwe barwiyitiriye babaka ruswa bababeshya ko bazabakurikiranira ibibazo kubimenyesha uru rwego kugirango bikurikiranwe bibashe gukemuka.

Ibi ni bimwe mu bikubiye mu itangazo rigenewe abanyamakuru ryatanzwe n’urwego rw’Umuvunyi nyuma yo kumenya ko hari abantu biyitiriye uru rwego bagasaba abaturage amafaranga babizeza kubakemurira ibibazo byabo.

Mu minsi ishize, urwego rw’Umuvunyi rufatanyije na Polisi y’u Rwanda bataye muri yombi abantu batanu biyitiriraga urwo urwego.

Aba bantu ngo bajyaga bahamagara abayobozi bo mu nzego z’ibanze, Polisi, abacamanza, abashinjacyaha n’abandi bakababwira ko ari abakozi b’urwego rw’Umuvunyi kandi ko bashinzwe gukurikirana dosiye maze bakabasaba amakuru bakayifashisha bashuka abaturage bakabaka ruswa bababwira ko barimo kubakurikiranira ibibazo.

Aba batekamutwe ngo bahamagaraga abaturage biyise amazina y’abakozi b’urwego rw’Umuvunyi cyangwa abandi barukozemo maze bakabasaba kuboherereza amafaranga bakoresheje uburyo bwo kohererezanya amafaranga hakoreshejwe terefoni igendanwa.

Umuvunyi mukuru yaburiye abanyarwanda bose guca ukubiri no gutanga ruswa no kwirinda koherereza amafaranga abantu batazi.

Yisangize Inshuti.

Ibitekerezo

Tanga Igitekerezo