Urubanza rwa bene Rwigara n’umubyeyi wabo rwongeye gusubikwa

Urubanza rwa bene Rwigara aribo Diane, Anne n’umubyeyi wabo Adeline Rwigara baregwamo rwongeye gusubikwa nyuma y’uko bavuze ko batarabona dosiye ikubiyemo imyanzuro y’ubushinjacyaha ikubiyemo ibyaha baregwa ngo ubunganira ayisome neza.

Nk’uko bisanzwe Diane, Anne na Adeline Rwigaraba bageze ku rukiko barizwe cyane na polisi binjizwa mu cyumba cy’iburanisha.

Kuri iyi nshuro noneho baje bafite umwunganizi ariwe Me Buhuru Pierre Celestin bitandukanye n’ubushize aho baje nta mwunganizi bafite ari nabyo byatumye urubanza rwabo icyo gihe rusubikwa.

Uyu mwunganizi ariko yavuze ko atarabona imyanzuro y’ubushinjacyaha ikubiyemo ibyaha aba bakiriye be bashinjwa, bityo asaba kuyihabwa kandi anasaba ko urubanza rusubikwa kugirango ahabwe umwanya wo kurebamo no uyisesengura.

Ubushinjacyaha bwagaragaje ko budashobora gutanga dosiye yabwo kuko ikiri ibanga, icyakora buvuga ko mu gihe umwunganizi cyangwa abaregwa baba bakeneye kumenya ibyo baregwa, ubushinjacyaha bushobora kubibamenyesha mu bundi buryo ariko batabahereje idosiye yose kuko ikiri ibanga ry’ubushinjacyaha mu gihe cyose urubanza rutaraburanwa mu mizi.

Ubushinjacyaha bwagaragaje ko ari ubushake bucye bw’abaregwa kuba batarabona iyi myanzuro ariko Me Buhura akomeza gusaba ko urubanza rusubikwa kandi agahabwa iyo dosiye n’umwanya wo kuyisoma neza maze asaba Urukiko ko rwategeka Ubushinjacyaha gufasha uruhande rw’abaregwa bakabona uko biga kuri dossier yabo.

Ubushinjcyaha bwasabye uyu mwunganizi ko yabwegera bukamwereka ibikubiye muri dosiye ariko banga kubimuha mu mpapuro. Adeline na we yahise asaba urukiko ko rwategeka ko babona dosiye ikubiyemo ibyo baregwa ngo kuko batabizi.

Ubushinjacyaha bwateye utwatsi ibyo kuba Adeline atazi ibyo aregwa buvuga ko ibyo avuga abeshya ngo kuko ibyo baregwa babizi urukiko narwo rwavuze ko nta mpamvu yo gutegeka Ubushinjacyaha kuyisubiriramo abaregwa kuko ngo iyo dossier abaregwa bayimenyeshejwe.

Urukiko rwemeje ko urubanza rusubikwa kubera ibi bisabwa n’abaregwa rukazasubukurwa tariki ya 11/10/2017 bivuze ko bahawe iminsi 2 gusa mu gihe umwunganizi yari yasabye iminsi itanu.

Kubijyanye no guhabwa dosiye ibarega, Urukiko rwategetse ko abaregwa bamenyeshwa ibyo baregwa ariko rwemeza ko atari ngombwa ko bahabwa dosiye mu ntoki.

Bimwe mu bigize ibimenyetso bibashinja ibyaha baregwa harimo nk’amajwi, inyandiko mpimbano, ibaruwa Anne Rwigara yandikiye Jeune Afrique, ama liste y’abasinyiye Diane Rwigara (ashaka kuba kandida Perezida) ariho n’abantu bapfuye. Ibi byose ngo abaregwa ntabyo bafite.

Diane, murumuna we Anne na nyina Adeline bahuriye ku cyaha bashinjwa cyo guteza imvururu muri rubanda.

Nyina Adeline Rwigara we hakiyongeraho icyaha ashinjwa cyo kubiba amacakubiri muri rubanda.

Mu gihe Dianne we yihariye icyaha cyo gukora no gukoresha inyandiko mpimbano.

Yisangize Inshuti.

Ibitekerezo

Tanga Igitekerezo