Urubanza rwa ba Rwigara rwasubitswe ku nshuro ya kane

Nyuma yuko Adeline Rwigara asabye kuburana afite umwunganizi we wihariye, bazanye mu rukiko avuga ko ataramenya ibyo umukiriya we aregwa asaba umwanya wo kubisoma bituma urukiko rusubika urubanza ku nshuro ya kane.

Bwari ubwa kane Adeline Rwigara ureganwa n’abakobwa be ari bo Dianne na Anne bagezwa imbere y’urukiko rwisumbuye rwa Nyarugenge ngo baburanishwe ku ifungwa n’ifungurwa ry’agateganyo.

Kuri iyi nshuro ariko umwunganizi witwa Me Gatera Gashabana wunganira Adeline Rwigara ngo ejo hashize nibwo yasinyanye amasezerano na Adeline yo kumwunganira akavuga ko atarabona dosiye zirimo ibyamufasha kuburanira umukiriya we, bityo asaba guhabwa umwanya wo kumenya ibyo umukiriye we aregwa kugira ngo abashe kumwunganira.

Mu gushimangira ko nta byinshi azi kuri uru rubanza, Me Gashabana yavuze ko n’izina ry’umukiriya we atararimenya neza

Ubushinjacyaha bwavuze ko izi ari imbogamizi zidafite ishingiro zigamije gusa gutinza urubanza. Umushinjacyaha yavuze ko atiyumvisha uburyo urubanza rutagombye kumara amasaha 72 rumara iminsi 10 rugasubikwa inshuro enye zose.

Kuri iyi ngingo, Me Buhuru yavuze ko kubara amasaha 72 ateganywa ngo urubanza nk’uru habe hafashwe umwanzuro, abarwa haherewe igihe ubushinjacyaha bwavuze ibyo burega umuntu, nawe akiregura kandi yunganiwe.

Ubushinjacyaha bwasabye ko mu rwego rwo kwihutisha iburanisha, ubucamanza bwatandukanya urubanza rwa Adeline Rwigara n’urw’abakobwa be (Anne na Dianne) bityo aba bakobwa bakaburana ukwabo bunganiwe na Me Buhuru Pierre Celestin maze nyina akazaburana ukwe na we yunganiwe na Me Gatera Gashabana.

Abaregwa bamaganiye kure ubwo busabe bw’ubushinkacyaha bavuga ko bagomba kuburanishirizwa hamwe kuko hari n’ibyaha bahuriyeho, ibintu byanashimangiwe na Me Buhuru avuga ko abarezwe muri uru rubanza ari abantu batatu kandi kuba ari ubushinjacyaha bwabareze bukaba busabye ko batandukanywa ngo bikozwe byaba ari ukwivuguruza kuko bwanavuze ko hari ibimenyetso bahuriyeho.

Abaregwa bavuze ko basaba uburenganzira bwo guhabwa dosiye yabo, Bibiliya, ibitabo by’indirimbo.

Basabye kandi kwemererwa gusohoka bagahumeka umwuka wo hanze, kubonana n’abandi, no kubonana ubwabo kuko ngo ntibafungiye mu byumba bimwe kandi ngo bahabwa gusa iminota itandatu yo gusohoka mu munsi wose mu gihe Me Buhuru avuga ko itegeko ribemerera iminota 30 ku munsi.

Anne Rwigara kandi arasaba guhabwa umwanya wo kuvugana n’ababagemurira kuko ngo babaha iminota 3 gusa kandi nabwo bakavugana na bo barinzwe bikomeye.

Abacamanza bavuze ko bitewe nuko abaregwa bataratangira kuburanishwa mu mizi badashobora guhabwa kopi ya dosiye basaba.

Nyuma yo kwiherera umwanya utari muto, abacamanza bemeje ko urubanza rusubikwa rukazasubukurwa tariki 17 Ukwakira 2017 mu rwego rwo kubahiriza ubusabe bwa Me Gashabana bwo guhabwa umwanya wo gusoma dosiye ya Adeline akabona uko amwunganira mu mucyo.

Yisangize Inshuti.

Ibitekerezo

Tanga Igitekerezo