Urubanza Rwabugiri yatsinzwe agatanga umukobwa we ngo rukwiye kubera urugero ubucamanza bw’u Rwanda

Perezida w’urukiko rw’ikirenga avuga ko ikitwa ruswa mu bucamanza bw’u Rwanda gikwiye gucika abakozi 6 barayizize umwaka ushize kandi ngo urubanza Rwabugiri yatsinzwe rukwiye kuba urugero ku banyarwanda.

Perezida w’urukiko rw’ikirenga Prof Sam Rugege yabivuze yizeza Perezida Paul Kagame ko ubucamanza bw’u Rwanda buri gutera imbere kandi bari gukora ibishoboka ngo banoze imikorere.

Ati :”Nyakubahwa Perezida wa repubulika guca imanza neza kandi vuba bigendana no kugira abakozi b’inyangamugayo bakurikiza amategeko arebana n’iburanisha,umutima nama wabo n’amahame mboneza mwuga abagenga.”

Yavuze ko kurwanya ruswa ari urugamba batazatsindwa ati :”Abacamanza n’abakozi b’inkiko babikangurirwa kenshi haba mu mahugurwa no mu nama zinyuranye. Kurwanya ruswa n’imikorere mibi mu bucamanza n’abanditsi ni urugamba tudashobora gutsindwa kabone n’iyo byafata igihe kinini bitewe n’amayeri y’abarya ruswa muri uyu mwaka dushoje abakozi 6 bafatiwe ibihano birimo no kwirukanwa.”

Yavuze ko umwiherero abagize wabasigiye amasomo menshi bijyanye n’umuco harimo indangagaciro z’ubutabera mu muryango nyarwanda uhereye mu kinyejana cya 16.

Ati :”Twagaragarijwe ko kuva cyera ko guca imanza byari bitagambiriye kwemeza gusa utsinzwe n’utsinze ahubwo byari bigamije gukura ikibi mu miryango no kunga abatanyijwe n’icyaha. Uwo muco wo kunga ukaba warateshejwe agaciro n’abakoroni bituma ubutabera abanyarwanda bahabwa butabagera ku nyota yabo uko bikwiye.”

Yavuze ko amahugurwa bakoze bayigiyemo byinshi birimo ubupfura n’ubunyangamugaye kandi ko bize ko nta muntu uri hejuru y’amategeko nk’uko byahozeho mu bucamanza bw’u Rwanda atanga urugero rw’urubanza rwarezwemo umwami Rwabugiri agatsindwa akanatanga umukobwa we.

Ati :”urugero ni urubanza rwa Semakamba arega umunyarwanda Rwabugiri amuregera umwami Kigeli wa 4 ariwe Rwabugiri kubera kwihorera binyuranyije n’umuco Rwabugiri agatanga icyiru cy’inka 8 n’umukobwa we nk’umugeni mu muryango yari yakoreye icyaha.”

Iki gisa n’icyo Perezida Kagame yababwiye ko bakwiye kujya bacira imanza n’ibikomerezwa bikora ibyaha.

Ati :” Umuco w’uko abato aribo bakwishyura ibyo bakoze gusa ugomba gucika burundu. Twese imbere y’amategeko tukareshya, Ubutabera ntabwo bugomba kujya ku batoya gusa ngo abo mu nzego zo hejuru barindwe n’inzego zabo.”

Yisangize Inshuti.

Ibitekerezo

Tanga Igitekerezo