Umwunganizi yavuze ko ubushinjacyaha bwinjiye mu mabanga ya ba Rwigara nta burenganzira

Kuri uyu wa 18 Ukwakira, urubanza rwa ba Rwigara rwakomeje baburana ku ifungwa n’ifungurwa ry’agateganyo maze Me Buhuru wunganira Dianne na Anne avuga ko ubushinjacyaha nta burenganzira bwari bufite bwo kwinjira muri telefone za ba Rwigara batabiherewe uruhushya ruturutse kwa Minisitiri w’ubutabera.

Urubanza ku ifunga n’ifungurwa ry’agateganyo kuri Dianne Rwigara, Anne Rwigara na Adeline Mukangemanyi rwakomereje aho rwsubikiwe kuwa 16 Ukwakira. Umwunganizi wa Anne na Diane ari we Me Buhuru ni we watangiye yunganira aberegwa ku byo ubushinjacyaha bwari bwashinje abakiriye be mu iburanisha riheruka.

Uyu munyamategeko yatangiye avuga ko ubushinjacyaha bwavogereye amabanga y’abakiriye be kandi butabifitiye uruhushya. Yashimangiye ko ubushinjacyaha butari bufite ububasha bwo kwinjira mu butumwa abakiriye be bohererezanyije bakoresheje terefone zabo kuko ari amabanga ntavogerwa y’umuryango.

Yavuze ko kwinjira mu mabanga ya telefone y’umuntu bisaba uruhushya rw’Umushinjacyaha Mukuru kandi na we agatanga ubwo burenganzira yabiherewe ububasha na Minisitiri w’ubutabera ngo kuko ari ko ingingo ya 72 y’itegeko ry’imiburanishirize y’ imanza z’inshinjabyaha ibiteganya.

Ashingiye ku kuba muri dosiye nta cyemezo cyemerera ubushinjacyaha kureba amabanga ari muri telefone z’abaregwa, Me Buhuru avuga ko ibimenyetso by’amajwi byafashwe binyuranyije n’amategeko akavuga ko bidakwiye kugenderwaho.

Me Buhuru avuga ko ubushinjacyaha bwagombaga gusaba ubwo burenganzira kuko ngo ibimenyetso biri mu mabanga y’abantu biba bishobora guhindurwa, bikongerwa cyangwa bikagabanywa.

Nyuma yo kuvuga atya, umucamanza yamubajije niba hari ibimenyetso akeka ko byaba byarahinduwe asubiza avuga ko nta cyizere yabiha. Yahise abaza impamvu igihe humvikanishwaga amajwi ashinja abakiriye be bahisemo uduce duto tw’amajwi yabo tugaragaza ibibashinja gusa akibaza niba nta magambo meza bavuze.

Umucamanza ariko yavuze ko ibi byakozwe urukiko rubanje kubyemera. Me Buhuru yabajije impamvu ibimenyetso ubushinjacyaba bwagaragaje mu majwi y’abaregwa birimo ibibashinja gusa kandi ubushinjacyaha bufite inshingano zo gushaka ibimenyetso bishinja n’ibishinjura.

Ibi yanabigarutseho avuga ko ubushinjacyaha bwavuze ko nta muntu numwe ushinjura Dianne akibaza niba mu bavandimwe be cyangwa mu bantu bose basinyiye Dianne nta muntu wabasha kumushinjura ngo yemeze ko yamusinyiye, yavuze ko abahakanye ko bamusinyiye ari uko babonaga ko babyemeye bishobora kubagaruka.

Agaruka kuri simukadi eshanu zasanzwe kwa Rwigara bikekwa ko zaba zarakoreshejwe mu manyanga yo gushaka imikono, Dianne yavuze ko nta kibazo gikwiye kubonwa kuri simukadi eshanu zasanzwe mu rugo rw’abantu barindwi. Ngo izo simukadi ntizikwiye guhuzwa n’abantu bamusinyiye babarirwa mu magana.

Ikindi ni uko yavuze ko abantu bahakanye ko bamusinyiye kandi bari ku rutonde rw’abamusinyiye yavuze ko babihakanye batinya ingaruka z’ibyari kubabaho iyo babyemera kandi ngo bamwe bashobora kuba barageze mu bugenzacyaha bakagira ubwoba bagahitamo gusinya imikono itandukanye n’iyo basinye igihe bamusinyiraga.

Dianne yavuze ko imikono yasuzumwe muri Raboratwari (Laboratoire) ariko batigeze basuzuma umukono we ngo bawugereranye n’iyo, ndetse ngo ntiyizeye ubwisanzure bw’abo bapimiye imikono.

Ubushinjacyaha bwavuze ko mu gihe cyo gusuzuma imikono y’abasinyiye Diane Rwigara bitari ngombwa gupima umukono wa Diane kuko harebwaga niba iyo mikono ari iy’abo bantu bigaragara ko bamusinyiye, kandi ngo ntibagarukiye ku kureba imikono gusa ahubwo banayijyanye muri Laboratoire ngo isuzumwe umwimerere.

Me Buhuru yavuze ko urwandiko bivugwa ko yandikiwe JeuneAfrique, nta mukono (signature) w’umwe mu baregwa uriho bityo ngo ntibarushinjwa kuko atari inyandiko yabo, Anne yavuze ko inkuru yagaragaye kuri Jeunne Afrique ariko yanditseho ko ari iya RFI bityo ngo bikwiye kubazwa icyo gitangazamakuru kandi bo bakarekurwa burundu.

Ubushinjacyaha bwavuze ko bwagiye gukoresha ibimenyetso bwasanze kuri telefone z’abaregwa bwisunze iteka rya Minisitiri rigena igenzura ry’itumanaho. Yavuze ko ibyo bakoze atari igenzura ry’itumanaho kuko igihe abaregwa bavuganaga nta muntu wabumvirije cyangwa ngo abagenzure, yavuze ko amajwi atigeze afatwa mu gihe bavuganaga, ahubwo yabonywe nyuma nk’ibimenyetso bigize icyaha.

Me Gatera Gashabana wunganira Adeline Mukangemanyi we yavuze ko ashingiye ku kuba itumanaho ry’umuntu ari ntavogerwa kandi inyinshi mu mpamvu ubushinjacyaha bugenderaho bushinja umukiriye we zikaba ari amajwi bwafatiye muri telefoni z’abaregwa, yasabye ko izo mpamvu ziteshwa agaciro kuko ubutumwa bwakuwe kuri telefone z’abaregwa bwakoreshejwe mu buryo butemewe n’amategeko.

Mu iburanisha ry’uyu munsi hari amajwi yumviwe mu muhezo kuko urukiko rwabyemeje rushingiye ku kuba amakuru arimo ashobora kwica iperereza kuko hari abavugwamo bagikorwaho iperereza, hakaba n’andi makuru ngo yagira ikibazo ku mutekano w’igihugu, nyuma yo kumva aya majwi, abaregwa nabwo barayireguraho mu muhezo.

Nyuma yo kumva impande zombi, Urukiko rwanzuye ko umwanzuro ku ifungwa n’ifungurwa ry’agateganyo ku baregwa uzasomwa kuwa gatanu tariki 20 Ukwakira.

Soma inkuru yabanjirije iyi ivuga kuri uru rubanza ukanda HANO

Yisangize Inshuti.

Ibitekerezo

Tanga Igitekerezo