Ubushinjacyaha bw’u Rwanda bwijeje ubutabera mu rubanza rwa Seyoboka ukekwaho Jenoside

Seyoboka Jean Claude yagejejwe mu maboko ya Polisi y’u Rwanda

Ubushinjacyaha bw’u Rwanda bwijeje ubutabera mu rubanza rw’umunyarwanda Seyoboka Jean Claude woherejwe na Canada mu Rwanda ngo akurikiranwe ku byaha aregwa bya Jenoside n’ibyibasiye inyokomuntu.

Mu masaha y’ijoro ryo kuri uyu wa 17 rishyira ku wa 18 Ugushyingo ni bwo Seyoboka yagejejwe mu Rwanda nyuma yo koherezwa n’igihugu cya Canada.

Canada yohereje Seyoboka nyuma yuko ubushinjacyaha bw’u Rwanda bwabisabye kugirango bumukurikiraneho ibyaha bya Jenoside akekwaho kuba yarakoreye muri Nyarugenge mu yahoze ari Perefegitura ya Kigali.

Akigezwa i Kigali yamenyeshejwe ibyaha aregwa n’uburenganzira yemererwa n’amategeko burimo guhabwa umwunganizi mu by’amategeko. Ku ikubitiro yabajijwe yunganirwa na Nkundabatware Albert.

Seyoboka arashinjwa ibyaha birimo icya Jenoside, icyo kurimbura imbaga, n’icyibasiye inyokomuntu, akaba yagejejwe ku kibuga cy’indege mpuzamahanga agashyikirizwa Polisi y’u Rwanda.

Seyoboka wahoze mu ngabo za kera (Ex-Forces Armees Rwandaise -Ex-FAR), yatswe sitati y’ubuhunzi na Canada nyuma y’aho bigaragariye ko igihe yakaga ubuhunzi atigeze avuga ko yigeze kuba mu ngabo z’u Rwanda, nyuma hakanamenyekana ko ashobora kuba yaragize uruhare muri Jenoside yakorewe abatutsi mu mwaka wa 1994, ari na bwo Canada yafashe umwanzuro wo kumwohereza kuburanira mu Rwanda.

Umuvugizi w’Ubushinjacyaha bw’u Rwanda Faustin Nkusi yavuze ati:”Seyoboka azabona ubutabera mu Rwanda, tuboneyeho n’umwanya wo gushimira ubuyobozi bwa Canada kuba bwohereje Seyoboka ndetse n’ubufatanye bwabo n’imbaraga bashyira mu guca no kurandura umuco wo kudahana”.

Yavuze ko agiye kuba afungiye kuri sitasiyo ya Polisi, kugirango abazwe ku byaha akekwaho nyuma yaho dosiye ye ikazoherezwa mu bushinjacyaha, aha akaba yanavuze ko ibi bitagomba kurenza iminsi 5 nk’uko biteganywa n’amategeko.

Ubushinjacyaha bunashinja Seyoboka gutegura no kwitabira inama zitegura Jenoside no kugira uruhare mu rupfu rw’abatutsi 72, ndetse agahagarikira n’ubundi bwicanyi mu cyahoze ari komini Nyarugenge.

Mu mwaka wa 2007 Seyoboka yakatiwe n’Urukiko Gacaca rwa Nyarugenge mu Mujyi wa Kigali igifungo cy’imyaka cumi n’icyenda (19) adahari, nyuma yaho ubushinjacyaha bw’u Rwanda busohora impapuro zo kumuta muri yombi.

Mu 1996 ni bwo Seyoboka yari yahawe sitati y’ubuhunzi na Canada, akaba ari umukwe wa Colonel Elie Sagatwa, uyu na we akaba ari musaza wa Agathe Kanziga, umugore w’uwahoze ari Perezida w’u Rwanda Juvenal Habyarimana.

Seyoboka yoherejwe mu Rwanda ngo aburanishwe ku byaha bya Jenoside nyuma ya Dr.Leon Mugesera nawe woherejwe na Canada muri 2012, akaba yarakatiwe gufungwa burundu.

Yisangize Inshuti.

Ibitekerezo

Tanga Igitekerezo