Warning: imagejpeg(local/cache-vignettes/L463xH309/arton12378-b4786.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
U Rwanda ruracyafite icyizere cyo gufata abarundi bakoze Jenoside yakorewe Abatutsi .|. Makuruki.rw | Amakuru Asesenguye!

U Rwanda ruracyafite icyizere cyo gufata abarundi bakoze Jenoside yakorewe Abatutsi

Minisitiri Busingye (iburyo) avuga ko icyizere cyo gufata abarundi bahekuye u Rwanda kigihari

Leta y’u Rwanda iravuga ko igifite icyizere cy’uko Abarundi basize bakoze Jenoside mu 1994 bazafatwa bakaburanishwa ndetse bagahanirwa ibyaha bakoze.

Agace k’amayaga, ni ukuvuga uduce tumwe two mu karere ka Kamonyi, Ruhango, Nyanza na Gisagara, twakozweho bikomeye na Jenoside yakorewe Abatutsi by’umwihariko bamwe mu barundi bari barahungiye muri utwo duce bishoye mu kwica Abatutsi urw’agashinyaguro kugeza n’aho baryaga abo babaga bamaze kwica.

Abo barundi bamaze gukora jenoside mu Rwanda basubiye iwabo barahunga, kugeza ubu nta n’umwe muri bo urafatwa dore ko no kubamenya bigoranye kuko nta myirondoro yabo ihamye yari izwi gusa inzego zibishinzwe ntizahwemye kuvuga ko biri gukurikiranwa.

Minisitiri w’Ubutabera w’u Rwanda akaba n’intumwa nkuru ya Leta Johnston Busingye avuga ko nubwo ibyo gufata aba Barundi basize bahekuye u Rwanda byavuzwe kenshi ariko ntibishoboke, ngo haracyari icyizere cy’uko bizashoboka mu bufatanye n’ibindi bihugu bigize umuryango w’Afurika y’u Burasirazuba.

Yagize ati: “ Dutekereza ko bene ubu bufatanye ari intambwe nziza cyane yatuma iyo nzira tuyigeraho, nta gihugu na kimwe gikwiye kwemera kuba indiri y’abantu basize bakoze Jenoside yakorewe Abatutsi mu 1994 cyane cyane igihugu twaba duturanye, icyo twifuza ni uko abo bantu aho bari hose bafatwa.”

Minisitiri Busingye akomeza avuga ko kuba Jenoside ari icyaha kidasaza, bivuze ko abo barundi bakoze jenoside mu Rwanda aho bazafatirwa hose bagomba kuzagezwa imbere y’inkiko bakaburanishwa.

Ati: “ Jenoside ni icyaha kidasaza, yaba ejo cyangwa ejo bundi abo bantu byanze bikunze ntekereza ko bakwiye kuzagezwa imbere y’ubutabera. Igihugu rero icyo ari cyo cyose uwo muntu umwe cyangwa benshi baba barimo ntekereza ko inzira nzima cyafata ari ukubageza ku butabera.”

Abadepite ba EALA bari mu Rwanda aho bakora ubushakashatsi ku ngengabitekerezo ya Jenoside, ihakana n’ipfobya ryayo bavuga ko bagiye gushyiraho amategeko ahana ingengabitekerezo ya Jenoside mu rwego rw’Umuryango wa Afurika y’Uburasirazuba.

Nta mubare w’Abarundi bazwi bishe abantu muri Jenoside yakorewe Abatutsi mu 1994, gusa icyizwi ni uko abayikoze bari impunzi.

Kugeza ubu ibyo gufata aba barundi bakoze jenoside biracyagoye cyane mu gihe hari bamwe mu bategetsi b’u Burundi bumvikana bapfobya Jenoside yakorewe abatutsi mu 1994 kandi abayobozi b’icyo gihugu aribo bafite ububasha bukomeye bwo gutuma abakekwaho ibyaha bafatwa.

Yisangize Inshuti.

Ibitekerezo

Tanga Igitekerezo