Nta munsi utabona mu binyamakuru umugabo wishe umugore, umugore wishe umugabo -PM Murekezi

1

Minisitiri w’intebe Anastase Murekezi yakiriye indahiro z’abashinjacyaha 2 abasaba gukurikirana ibyaha birimo ihohoterwa rikorerwa mungo ndetse n’ibimunga ubukungu bw’igihugu kandi bakanakurikirana abakoze jenoside bakidegembya.

Aba bashinjacyaha barahiye ni Rudahusha Didier, umushinjacyaha wo ku rwego rwisumbuye ndetse na Kayitesi Claudine umushinjacyaha wo ku rwego rw’ibanze.

Aba bombi bashyizweho n’inama y’abaminisitiri yateranye tariki ya 26 Gicurasi 2017 yari iyobowe na nyakubahwa Perezida wa Repubulika y’u Rwanda Paul Kagame.

Minsitiri w’intebe Anastase Murekezi yabasabye kutazatatira icyizere bagiriwe na Perezida Paul Kagame. Ati:”Murasabwa kutazapfusha ubusa icyizere mwagiriwe na Perezida wa Repubulika ndetse natwe twese abanyarwanda , umurimo w’ubushinjacyaha ni umurimo ukomeye ujyana n’inshingano zikomeye zo kubahiriza uburenganzira bwa muntu, uwo murimo usaba ko amategeko yose awugenga yubahirizwa ariko mbere ya byose uyu murimo ubasaba kuba inyangamugayo, ugomba kunganirwa no kurangwa n’umutima nama wanyu.”

Yabasabye kandi gukorana neza n’abo basanze mu kazi ndetse no kwagura imipaka bagakorana n’amahanga bakazakurikirana abasize bakoze jenoside bakidegembya mu mahanga.

Ati :”Hari abandi bashinjacyaha muje musanga mukazi .. murasabwa rero kuzakorana neza mwese mugakora nk’ikipe ihora itsinda mugahererakanya umupira kugeza imbere y’abacamanza. … ikipe ihora itsinda igomba no kurenga imipaka y’igihugu cyacu mugakorana n’ubushinjacyaha bwo mu karere ndetse n’ubwo mu bihugu bya kure, bizabafasha cyane cyane mu gukurikirana amadosiye y’abakekwaho ibyaha bya jenoside yakorewe abatutsi bakidegembya muri ibyo bihugu.”

Minisitiri w’intebe Murekezi kandi yavuze ko hari amadosiye akomeje gufata intera ahabanye n’icyerekezo cy’u Rwanda abasaba kuyakurikirana.

Ati :”Hari madosiye arimo kugenda afata indi ntera kandi itandukanye n’icyerekezo cy’igihugu cyacu, amwe muri ayo madosiye ni aya akurikira, hari ibyaha by’ubwicanyi n’ibyaha by’ihohoterwa bimaze kuba byinshi cyane cyane bikorerwa mu miryango. Nta munsi w’ubusa utabona mu binyamakuru umugabo wishe umugore we cyangwa umugore wishe umugabo, abana bishe ababyeyi, ababyeyi bishe abana..."

....Hari ibyaha by’abatera abana b’abakobwa inda, hari ibyaha bimunga ubukungu bw’igihugu birimo ruswa, kunyereza umutungo wa Leta no kwambura za banki n’ibigo by’imari hari ibyaha by’iyezandonke hari n’ibyaba byambukiranya imipaka ndetse n’ibikorwa by’itera bwoba.”

Ibi byaha by’ihohoterwa rishingiye mu ngo bihangayikishije igihugu ndetse biragenda bifata indi ntera. Muri iki gihe kandi Leta ihanganye n’ikibazo cy’abantu batera abana inda zitateguwe ndetse akenshi bakabihakana bigatuma babaho mu buzima bugoranye bo n’abana babo.


Rudahusha Didier na Kayitesi Claudine nibo bamaze kurahirira umurimo w’ubushinjacyaha

Yisangize Inshuti.

Ibitekerezo 1

Tanga Igitekerezo