Muhanga: Inteko z’abaturage zatumye ’inzoga z’abagabo’ zicika

Bamwe mu baturage bo mu karere ka Muhanga, Umurenge wa Mushishiro baravuga ko kuba harashyizweho inteko z’abaturage byabafashije kwikemurira ibibazo, ndetse bica ruswa yari izwi nk’inzoga z’abagabo.

Inteko z’abaturage ni imwe muri gahunda za leta y’u Rwanda zo kwishakamo ibisubizo, aho abaturage bahurira ku rwego rw’Akagari bari kumwe n’ abayobozi bagakemura ibibazo bimwe na bimwe baba bafite.

Abaturage bo mu murenge wa Mushishiro ho mu Karere ka Muhanga bavuga ko inteko z’abaturage zibafitiye akamaro kuko hari ibibazo bihakemukira nyamara mbere byarasiragizaga ba nyirabyo.

Vincent Bapfakurera wo mu kagari kwa Rwigerero avuga ko mu nteko y’abaturage yo mu kagari atuyemo bahura bakungurana ibitekerezo ndetse n’ibibazo byajyaga bijya ku mu nzego zo hejuru ubu ngo bimaze kugabanuka.

Yagize ati “Inteko y’abaturage turaganira tukungurana ibitekerezo ndetse n’ikibazo umuntu afite akabasha kukigaragaza tukakigaho n’abaturage kigakemuka, usanga nta manza zikijya ku rwego rwo hejuru. Ni ibintu byiza cyane, ni ibintu byafashije na wa muntu ufite ikibazo na mugenzi we niho tugikemurira.”

Nkusi Oreste utuye mu kagari ka Nyagasozi na we avuga ko kuba Inteko z’abaturage zarongererewe imbagara zikitabirwa n’abayobozi batandukanye, byaciye ruswa yakwaga(yitwaga inzoga z’abagabo).

Yagize ati “Ubu abaturage barajijutse ntawe wabwira iby’inzoga z’abagabo, mbere iyo wabaga utatanze inzoga z’abagabo, ntawakugiraga mu kibazo.”

Umunyabanga Nshinwabikorwa w’Umurenge wa Mushishiro, Uwanyirigira Frolence na we yemeza ko Inteko z’abaturage zagabanyije ibibazo byajyanwaga ku Murenge, ubu ibyinshi abaturage barabyikemurira.

Yagize ati “Umwaka ushize twakiraga byibuze buri cyumweru ibabazo 25 muri buri kagari, ariko ubu ntabwo ari byinshi, abaturage basobanukiwe inteko z’abaturage babijyanayo bigakemuka kuruta uko byari kuza ku murenge kuko baha hari abatangabuhamya.”

Ibibazo bikunze kugaragara mu murenge wa Mushishiro ni ibishingiye ku butaka n’ ibabazo by’ingurane.

Inteko z’abaturage ziba inshuro imwe mu cyumweru, abayobozi batandukanye bakaba bajya mu tugari bagakemura ibibazo.

Inteko z’abaturage zashyizwemo imbaraga nyuma y’aho perezida wa repubulika y’u Rwanda agiye asanganizwa ibibazo n’abaturage nyamara bikagaragara ko byakabaye byarakemuwe n’abayobozi b’inzego z’ibanze.

Yisangize Inshuti.

Ibitekerezo

Tanga Igitekerezo