Ababajwe n’umugabo we waketsweho gusambana akicwa, abamwishe bagafungwa ijoro rimwe

2

Nyirantwari Francine utuye mu murenge wa Nyabinoni mu Karere ka Muhanga, avuga ko umugabo we yishwe n’abantu batanu bamuroshye muri Nyabarongo bagafungwa ijoro rimwe, akaba ababazwa no kuba atarabonye ubutabera.

Mu kiganiro yagiranye na MAKURUKI Nyirantwari Francine yavuze ko atewe intimba no kuba atarabonye ubutabera ku rupfu rw’umugabo we.

Adutekerereza uko umugabo we yishwe Francine yagize ati ”Yari yatembereye ari nimugoroba ubwo mu gihe yari ari gutaha ajya ahantu ku rugo mbese rw’umugore bicara hafi y’urwo rugo, ...yari azamukanye n’inzoga bari kuyinywa"

"Hanyura umukobwa arabakongereza (arabamurika n’isitimu) noneho abakongereje wa mugore yahise amwikanga ahita azamuka ajya mu rugo iwe ubwo umugabo wanjye arahasigara. Ubwo wa mukobwa yavuye gucyura ihene ahura n’abagabo."


Francine asaba Meya Beatrice Uwamariya wa Muhanga kumurenganura ubwo bahuriraga i Nyabihu

Francine yakomeje agira ati "Mu gihe wa mukobwa wabakongereje akibatekerereza ko hepfo aho hari umuntu, wa mugore bari kumwe na we yahise ava mu rugo araza mu muhanda ahageze ahita abwira umugabo wanjye ati wadufashije ukazamuka ubwo igihe bakubwiriye uri kumara iki aho ngaho! Ubwo yahise abwira abo bagabo ngo nibamanuke bamubaze icyo ari kuhamara ubwo bahita bamwirukaho gutyo barinda bamuta mu ruzi (Nyabarongo).”

Francine avuga ko abamwiciye umugabo bafashwe bagafungwa ijoro rimwe gusa bahita barekurwa nyuma yo kwiyambaza inzego zibanze.

Ati:” Nahereye mu Kagari ngera ku Murenge , mpageze bahamagara polisi ubwo abo bamwishe bari bafashwe bahita babafunga ijoro rimwe ku murenge bahita babafungura . Ubundi bakajya bampoza mu nzira twitaba polisi bakajya batubwira ngo ejo tugaruke bigeze aho baturambiwe barababwira ngo bo bage bitaba buri kwezi ngo jyewe ningende niyicarire ubu nyine nararekeye byaranyobeye, banze kubahana birirwa bidegembya”

Abaturanyi b’uyu mugore wiciwe umugabo baganiriye na Makuruki bavuze ko uyu mugabo yishwe nyuma yo gufatwa yagiye gusambana ari nacyo cyatumye aba bagabo bamwirukankana bamuta muri Nyabarongo.


Nyirantwari Francine usaba kurenganurwa

Francine yavuze ibyo gusambana bivugwa k’uwari umugabo we atabizi. Ati:”Oya ntabwo mbizi niba ariho yari yagiye ariko ikizima cyo ni uko yari ari aho ngaho."

Fortune Mukagatana, Umuyobozi wungirije ushinzwe imibereho myiza mu Karere ka Muhanga avuga ko icyo kibazo bakizi kandi bagerageje kugikurikirana bakagishyikiriza inkiko.

Ariko kandi ngo kuba badafunze si igitangaza kuko umuntu ugikurikiranwaho icyaha ashobora gukurikiranwa afunze cyangwa adafunze.

Ati: ”Ariko rero ngirango ntabwo igihano ari ugufungwa, iyo umuntu agikekwaho icyaha uwo muntu ashobora gukurikiranwa ari hanze. Ubugenzacyaha ni bwo bureba icyo bukora bo bazi uko bimeze idosiye barayifite niba bagomba gukurikirana umuntu ari hanze babikora ari hanze kandi niba bagomba kumukurikirana afunze bagomba kubikora afunzwe”

Yisangize Inshuti.

Ibitekerezo 2

Tanga Igitekerezo