Maj Dr Rugomwa yakatiwe imyaka icumi no kwamburwa impeta za gisirikare azira gukubita umwana agapfa

5

Urukiko rwibanze rwa Gisirikare rwakatiye igifungo cy’imyaka icumi Maj.Dr.Aimable Rugomwa, umusirikare wari umaze iminsi akurikiranwaho gukubita Mbarushimana Théogène bikamuviramo gupfa.

Kuri uyu wa 21 Kanama 2017. Urukiko rwibanze rwa gisirikare rw’i Nyamirambo, rwahamije Maj Dr Rugomwa icyaha cyo gukubita no gukomeretsa Mbarushimana Théogène bikamuviramo urupfu maze rumukatira igifungo cy’imyaka icumi muri gereza.

Uretse iki gifungo cy’imyaka icumi, urukiko rwategetse ko Maj Dr Rugomwa yishyura ihazabu ingana na 11 570 000 Frw (y’indishyi ndetse n’igihembo cya avoka n’ibindi byakoreshejwe mu rubanza no mu gushyingura Mbarushimana.)

Kuri ibi hiyongeraho no kunyagwa impeta zose za gisirikare.

Mu isomwa ry’uyu mwanzuro w’ubanza, Maj.Dr.Aimable Rugomwa, n’abanyamategeko bamwunganira muri uru rubanza uko ari babiri bose ntabwo bagaragaye mu rukiko.

Iki cyaha Maj Dr Aimable Rugomwa akurikiranweho yagikoze mu ijoro ryo kuwa 09 Nzeri 2016.

Mu maburanisha atandukanye, Maj Dr Rugomwa yagiye agaragaza ko atishe uyu Mbarushimana yabigambiriye ahubwo akavuga ko we yarwanye na we amukekaho ubujura kuko yavugaga ko yamufatiye iwe mu gipangu nijoro ashaka kwiba ibikoresho by’imodoka ye.

Ibi yabihurizagaho n’abamwunganira aho bavugaga ko urupfu rwa Mbarushimana rwaturutse ku kuba Maj Dr Rugomwa yari arimo kwitabara.

Uyu Mbarushimana Rugomwa yitaga igisambo yari uw’umuturanyi we witwa Gahutu, akaba yari amutumye kuri butiki mu ijoro yiciwemo agafatwa arimo asubira imuhira.

Ubushinjacyaha bwo bwagiye bugaragaza ko Maj Dr Rugomwa ari we ubwe wafashe Mbarushimana akamujyana mu gipangu cy’iwe mu rugo akamukubita kugeza abaye intere yabona ari hafi gushiramo umwuka akamujyana hanze y’igipangu akahamujugunya.

Umucamanza yavuze ko uregwa ahamijwe icyaha cyo gukubita cyangwa gukomeretsa bigatera urupfu kuko abatangabuhamya bemeje ko bamusanganye inkoni ndetse bagasanga Mbarushimana aryamye mu kidendezi cy’amaraso.

Iki cyaha mu ngingo ya 151 y’amategeko ahana gihanishwa igifungo cyo kuva ku myaka 10 kugeza ku myaka 15.

Amategeko yemerera Maj Aimable Rugomwa iminsi 30 yo kujuririra uyu mwanzuro w’urukiko.

Yisangize Inshuti.

Ibitekerezo 5

  1. Andika Igitekerezo Hano Ubundi se ibikoresho byari kwibwa kumodoka binganya agaciro numuntu.RDF soldier kweri? ntibikwiye ibyo yakoze

  2. Gusa birakwiriye kuko bamwe munzego zishinzwe umutekano mbona bakora ibyo bashatse harimo no guhohotera abaturage nabandi nibahanwe maze abanyarwanda tube mugihugu kizira akarengane nokwishyira ukisanga

  3. Gusa birakwiriye kuko bamwe munzego zishinzwe umutekano mbona bakora ibyo bashatse harimo no guhohotera abaturage nabandi nibahanwe maze abanyarwanda tube mugihugu kizira akarengane nokwishyira ukisanga

Tanga Igitekerezo