Komisiyo y’ubumwe n’ubwiyunge yahwituriwe gukoresha neza ingengo y’imari

Minisitiri muri Perezidansi, Venantie Tugireyezu

Mu mwiherero wabereye iKigali kuri uyu wa Kabiri tariki 12 Nyakanga 2016 uhuje ba komiseri n’abakozi muri komisiyo y’ubumwe n’ubwiyunge basabwe gukoresha neza ingengo y’imari igenerwa iyi komisiyo nyuma y’aho bashyizwe ku rutonde rwa bimwe mu bigo byacunze nabi imari yabyo.

Ibi ni ibyatangajwe na Ministiri muri Perezidansi ya Repuburika Venantie Tugireyezu mu kiganiro kirambuye yatangiye muri uyu mwiherero wa Komisiyo y’igihugu y’ubumwe n’ubwiyunge ku mikorere n’imikoranire hagati y’abakozi.

Nyuma y’ibiganiro byagiye bitangwa habaye ho umwanya wo kungurana ibitekerezo gusa benshi bagiye batanga ibitekerezo bijyanye n’uburyo iyi komisiyo yarushaho kwiyubaka no kugira imbaraga nk’imwe muri komisiyo zikorana bya hafi n’inzego nyinshi.

Hagiye haboneka na none abasaba ubuvugizi berekana ko iyi komisiyo ifite ingengo y’imari ikiri hasi ituma hari ibice bimwe na bimwe batageramo ngo bigishe ubumwe n’ubwiyunge biturutse ku mpamvu z’amikoro.

Gusa nubwo ubu buvugizi bwasabwe, Ministiri muri Perezidansi yagarutse ku micungire mibi y’ingengo y’imari igenerwa iyi komisiyo aho yavuze ko bakwiye kwikubita agashyi nyuma y’aho raporo y’umugenzuzi w’imari igaragaje ko komisiyo y’ubumwe n’ubwiyunge yaje muri bimwe mu bigo byacunze nabi imari yabyo aho yatanze urugero rw’amafaranga yigeze gukoreshwa mu nyungu z’abakozi akandikwa nk’ayakoreshejwe mu bikorwa by’iyi komisiyo bigenerwa ingengo y’imari.

yagize ati: "ndabasaba ko mwajya mukoresha ingengo y’imari yanyu neza kuko byagaragaye ko raporo yatanzwe n’umugenzuzi w’imari yashyize iyi komisiyo muri bimwe mu bigo byakoresheje nabi ingengo y’imari"

Ministiri Tugireyezu yanagarutse ku kibazo cy’abakozi batagaragaza imitungo yabo mu gihe hari gukorwa igenzura ry’imitungo yabo maze abasaba ko batazagaragara kuri urutonde.

Mu gusoza ikiganiro ku mikorere n’imikoranire, Ministiri yabasabye gukomeza gukorana neza n’inzego anabasaba kubahana hagati yabo bishakira ibisubizo ndetse bakora ibishoboka byose ngo ubumwe n’ubwiyunge bugere ku kigero cy’ijna ku ijana.

Yisangize Inshuti.

Ibitekerezo

Tanga Igitekerezo