Kimironko: Umugabo wari wariyitiriye inzu ya Nyirabukwe yayikuwemo kungufu z’inkiko [AMAFOTO]

Nizeyimana Eustache wari waranze gusohoka mu nzu ya Nyirabukwe ayita iye yayasohowemo ku ngufu z’amategeko nyuma yuko urukiko rwemeje ko ayisohorwamo.

Intandaro ya byose yaturutse ku kuba Nyirazuba Flavia yaratije umukwe we witwa Nizeyimana Eustache n’umugore we witwa Niyigena Yvette umuryango w’inzu yo gucururizamo iherereye Mu mudugudu w’Imanzi, Akagari ka Bibare mu Murenge wa Kimironko mu karere ka Gasabo

Nyuma yo kubatiza uyu muryango w’inyubako izwi nka Martin Plazza, ngo bayikoreyemo igihe kirekire nyuma baza kuyigarurira bayigira iyabo ku ngufu.

Ibi byatumye Nyirazuba yitabaza urukiko rwisumbuye rwa Gasabo ngo rumurenganure ari na rwo rwaje kwemeza ko Nizeyimana Eustache na Niyigena Yvette (umukobwa wa Nyirazuba) bagomba kuva mu nzu ya Nyirazuba kuko bayitijwe atari iyabo.

Me Jean Paul Mwitende, umuhesha w’inkiko w’umwuga waje mu gikorwa cyo gusohora Nizeyimana Eustache mu nzu ya Nyirazuba Flavia, yavuze ko yahawe integuza zitandukanye ngo ave muri iyi nzu ariko arinangira. Ngo yari yarayise iye ku ngufu kandi atari iye.

Yagize ati: "Igikorwa turimo ni icyo gusohora umuntu mu nzu y’abandi, yarayitijwe hanyuma nyuma asabwa kuyivamo ariko arabyanga, agenda ahabwa integuza zitandukanye ariko yanga kuzishyira mu bikorwa. Haje kwitabazwa inkiko haboneka icyemezo cy’urukiko rwisumbuye rwa Gasabo ubu kuri iyi saha ni cyo turimo gushyira mu bikorwa."

Yakomeje agira ati: "Impamvu tuyimusohoyemo nuko yayitijwe agashakakuyigira iye kandi ntabwo ari iye! ifite nyirayo kandi nyirayo afite ibyangombwa byuzuye byemeza ko ari iye."

Uyu muhesha w’inkiko avuga ko nta masezerano yabayeho hagati uya Nyirazuba na Nizeyimana ku buryo yaba yarayashingiyeho yanga kuva muri iyo nzu, ngo Nyirazuba yari yayimutije nkutije umwana we ngo yiteze imbere nkuko yabigenje ku bandi bana.

Uyu Nizeyimana n’umugore we Niyigena Yvette, ngo bari baratangiye kugenda bahindura ibintu bimwe na bimwe kuri iyi nzu kuko ngo bari barayigize iyabo bituma havuka ubwumvikane buke hagati y’umwana na nyina ariko ayimukuyemo arabyanga nibwo haje kwitabazwa inkiko.

Me Mwitende avuga ko itegeko ry’umutungo risobanura neza ko umutungo w’umuntu ari ntavogerwa bityo ngo ntiwakwitwaza ko umuntu ari umubyeyi wawe ngo utware umutungo we.

Me Mwitende yasomye umwanzuro w’urukiko w’urubanza rwasomwe kuwa 05 Ukwakira 2017 rwemeza ko Nyirazuba agomba guhabwa amazu ye umukwe we yihaye. Uwo mwanzuro urimo amagambo agira ati: "Urukiko rwemeje ko ikirego cya Nyirazuba Flavia gisaba umukwe we gusohorwa mu muryango umwe w’amazu ye yari yaramutije gifite ishingiro, rwemeje ko Nizeyimana Eustache agomba gusohorwa mu mazu ya Nyirazuba Flavia....Nta yandi mananiza!"

Ku itariki 03 Mutarama 2017, umunyamategeko wa Nyirazuba yahaye integuza Nizeyimana amuha iminsi 30 yo kuba yavuye munzu ya Nyirazuba arabyanga, Ku itariki 20 Werurwe 2017, ubuyobozi bwinjiye mu kibazo buragikemura na bwo busaba ko Nizeyimana atanga inzu ya Nyirazuba na bwo arabyanga, ku itariki 13 Urukiko rwamuhaye amasaha 72 y’integuza ngo ave muri iyo nzu ariko byageze kuri uyu wa 17 Ukwakira atarayivamo nibwo hitabajwe umuhesha w’inkiko kugirango arangize uru rubanza ku ngufu.

Umunyamabanga nshingwabikorwa w’Akagari ka Bibare Cyiza Edouard yavuze ko igihe cyari kigeze ngo aba bantu bave mu nzu itari iyabo. Ati: "Icyari ngombwa ni uko bagombaga kuva mu nzu, gusa bahawe igihe cyo kuva mu nzu ntibacyubahiriza, biba ngombwa rero ko hakoreshwa ingufu za Leta kugirango uwatsinze urubanza ahabwe ubutabera. Icyo twaje gukora uyu munsi ni ugushyira mu bikorwa umwanzuro w’urukiko."

Yaba Niyigena Yvette n’umugabo we Nizeyimana Eustache bose nta numwe wabashije kuvugana n’itangazamakuru ngo bagaragaze impamvu banze kuva muri iyi nzu.

Niyigena Yvette, umukobwa wa Nyirazuba akaba umugore wa Nizeyimana Eustache


Nizeyimana Eustache, umukwe wa Nyirazuba akaba umugabo wa Niyigena Yvette


Iyi nzu Nizeyimana na Niyigena bacururizagamo ibikoresho by’ubwubatsi

Kompanyi yabo yitwa Credo Ceramics



Mu byasohowe harimo n’ububiko bwuzuye amafaranga


Niyigena yabanje kugaragaza kwihagaraho avuga ko inzu ari ye ntawamusohoramo ariko abonye polisi aratuza


Gitifu w’Akagari ka Bibare na we yavuze ko amategeko yakurikijwe


Nyuma yo gusohoramo ibicuruzwa byose, Me Mwitende yafunze iyi nzu

Yisangize Inshuti.

Ibitekerezo

Tanga Igitekerezo