Kimenyi arashinjwa n’abo bareganwa na we ati ’ni amatakirangoyi’

Kimenyi Vedaste yashijwe n’abo bareganwa kunyereza umutungo w’ikigo cy’igihugu gishinzwe amashanyarazi (REG) bavuga ko uwo mutungo wakoreshejwe biturutse ku mabwiriza ya Kimenyi, na we ati: ’Ayo ni amatakirangoyi.’

Abaregwa ni Kimenyi Vedaste Ushinzwe kubakisha imiyoboro y’amashanyarazi ku rwego rw’igihugu muri REG akaba n’umuyobozi w’umuryango wa Rayon Sports, Niyotwizera Emmanuel wacungaga imirimo ya REG muri Kamonyi na Arsene Benihirwe wagenzuraga ibikorwa by’amashanyarazi mu Ntara y’Amagepfo.

Abaregwa barashinjwa kunyereza ibikoresho byajyanwaga kubaka umuyoboro w’amashanyarazi mu murenge wa Kayenzi mu Karere ka Kamonyi kandi waragombaga gukorwa n’ibikoresho bya Sosiyete yatsindiye isoko.

Isoko ryatsindiwe na sosiyete yitwa EGEBAD na yo yahise iriha indi yitwa BELECOM yagombaga gukoresha ibikoresho byayo nkuko byari biri mu masezerano iyo kompanyi yagiranye na REG.

Ubushinjacyaha bushinja aba bagabo kunyereza no kwangiza ibikoresho bya REG kuko babihaye BELECOM ngo ibikoreshe mu muyoboro wavuzwe haruguru kandi iyi kompanyi yaragombaga gukoresha ibikoreshpo byayo.

Niyotwizera na Benihirwe bo bavuga ko ibikoresho babihaga Kompanyi nyuma yo guhabwa amabwiriza na Kimenyi wari ubakuriye bityo bakavuga ko nta cyaha bakwiye kubarwaho kuko ibyo bakoze bakurikizaga amabwiriza y’umuntu wari ubakuriye mu kazi ari we Kimenyi Vedaste.

Kimenyi avuga ko ibikoresho yasinyaga ko bisohoka byabaga bigiye gukoreshwa ku zindi site za REG zari zirimo kubakwa mu murenge wa Kayenzi ariko uyu witwa Niyotwizera akabiyobya akabyihera iyi kompanyi ya BELECOM.

Kimenyi kandi avuga ko amabaruwa atanga ibikoresho yasinyagaho yabaga yaturutse kuri Arsene wari ushinzwe gukurikirana imiyoboro mu ntara y’amajyepfo ari ko Arsene yahakanye ko nta bikoresho yigeze asaba bijyanwa kuri uwo muyoboro ahubwo ko byakozwe mu izina rye asinyirwa na enjeniyeri Vincent ariko we ntiyabimenyeshwa kandi ngo yari ahari.

Umuseke watangaje ko ubwo Umucamanza yari abajije Kimenyi niba hari icyo apfa n’aba bamushinja kubaha amabwiriza yo guha ibikoresho BELECOM yasubije agira ati “ntacyo dupfa no mu buzima busanzwe, ntacyo dupfa…. Ni amatakirangoyi”

Ubushinjacyaha bwasabye ko aba bose bafungwa iminsi 30 y’agateganyo kuko barekuwe bashobora gutoroka ubutabera.

Aba bagabo bavuze ko bumva nta mpamvu zo gukomeza kubafunga kandi nubundi na mbere yuko bafatwa batarigeze batoroka basaba ko barekurwa bakaburana badafunzwe.

Kuwa 22 Kamena 2017.nibwo urukiko ruzasoma umwanzuro ku ifungwa n’ifungurwa ry’agateganyo.

Yisangize Inshuti.

Ibitekerezo

Tanga Igitekerezo