KABGAYI: Kiliziya Gaturika mu Rwanda yongeye gukoma rutenderi, ititandukanya n’icyasha cy’abajenosideri

5

Mu gihe Imyaka ibaye 22 Kiliziya Gaturika itarerura ngo yitandukanye n’uruhare rw’abari bayiyoboye n’abihayimamana bayo bagize uruhare muri Jenoside yakorewe abatutsi muri Mata 1994, mu gihe kandi imyaka ibaye 22 itarerura ngo isabe imbabazi ku ruhare rwayo muri Jenoside, kuri ubu Kiliziya Gaturika mu Rwanda yongeye gusubiza ibintu irudubi ubwo yashyiraga hanze ubutumire bwo kwizihiza yubile y’imyaka 25 ku bapadiri bayo barimo n’abahamijwe ibyaha bya Jenoside yakorewe abatutsi muri Mata 1994.

Mu butumire bwa Musenyeri Smargarde Mbonyintege Umushumba wa Diyosezi ya Kabgayi bwagiye ahagaragara kuri iki cyumweru bugakwirakwiza ku mbuga nkoranyambaga, aho bugaragaza ko Kiliziya Gaturika we n’umuryango w’abakirisitu bishimiye gutumira (abo bireba) mu itangwa ry’ubusaseridoti bwa Diyakoni Sebacumi Syvain no kwizihiza Yubile y’imyaka 25 y’abasaseridoti barindwi barimo Padiri Joseph Ndagijimana na Rukundo Emmanuel bombi bahamijwe ibyaha bya Jenoside yakorewe Abatutsi muri Mata 1994.

Padiri Joseph Ndagijimana wari Padiri Mukuru wa Paruwasi ya Byimana mu gihe cya Jenoside mu 1994 yahamijwe ibyaha bya jenoside birimo kuba yaricishije abatutsi barimo na mugenzi we Padiri Mpuguje, mu gihe Padiri Emmanuel Rukundo wari aumônier militaire (ushinzwe ibikorwa bya gisaseridoti mu gisirikare) mu 1993, nubwo yari padiri akaba yari yarahawe ipeti rya Kapiteni muri Ex-Far yakatiwe n’urukiko mpuzamahanga rw’Arusha imyaka 25 azira ibyaha bya Jenoside.

Abanyarwanda benshi biganjemo abacitse ku icumu rya Jenoside yakorewe abatutsi, abashakashatsi abanyapolitiki bamwe na bamwe mu Rwanda kuri iki cyumweru ku mbuga nkoranyambaga bakomeje kwerekana ko bimeze nk’agashinyaguro ka Kiliziya Gaturika kuba igiye kwizihiza Yubile y’abapadiri bayo bahamijwe ibyaha bya Jenoside mu gihe batandukiriye igihango cyo gushumba intama baragijwe, mu gihe ubwayo (Kiliziya) itarakuraho icyasha n’umugayo ku byakozwe mu izina ryayo muri Jenoside yo muri Mata 1994.

Nyuma ya 1994 uruhare rwa Kiliziya Gatorika muri Jenoside yakorewe abatusi rwakomeje gushyirwa mu majwi kuva I Roma ndetse no mu Rwanda ariko nta na rimwe Kiliziya Gatorika yigeze ihagarara mu cyuho cy’abihaye Imana bayo batandukiriye ngo yitandukanye nabo cyangwa se ibanenge ku mugaragaro. Gusa ni kenshi Kiliziya yagiye ivuga ko abihayimana bayo bagize uruhare cyangwa bijanditse mu marorerwa ya Jenoside babibazwa ku ruhare rwabo ku giti cyabo, kuko batabikoze mu izina rya Kiliziya, gusa igisa n’icyatunguranye ni ukuba yirengagije ibyahamijwe n’inkiko ikaba igiye kwizihiza Yubile y’imyaka 25 ku bahamijwe ibyaha n’inkiko.

Usesenguye Ibi bikaba bishobora gusubiza inyuma umubano ugicumbagira wa Kiliziya Gaturika na Leta y’u Rwanda warumaze gutera intambwe nyuma y’agatotsi katoroheje kawuranze nyuma ya Jenoside, bishobora gufatwa nko kwirengagiza uburemere Kiliziya ishobora kuba iha uruhare rw’abihaye Imana bayo muri Jenoside.

Uretse abatutsi benshi baguye muri za Kiliziya zitandukanye nka Ste Famille, Ntarama, Mibilizi n’abandi, abapadiri benshi bijanditse muri Jenoside yakorewe abatutsi muri Mata 1994 banakurikiranwa mu Nkiko z’u Rwanda no mu mahanga, barimo n’uwari Musenyeri wa Gikongoro Nyakwigendera Misago Augustin waje kugirwa umwere, ndetse Kiliziya Gaturika isabwa gusaba imbabazi no kwitandukanya n’ibyakozwe n’abihaye Imana bayo ariko na nubu ntabyo yigeze ikora.

Ntitwashoboye kuvugisha umuvugizi wa Kiliziya Gatorika Musenyeri Filipo Rukamba n’izindi nzego bireba kuko ubwo twandikaga iyi nkuru hari ku munsi w’icyumweru, turabizeza gukomeza kubakurikiranira iyi nkuru.

Ngubu ubutumire bwo gutanga ubusaserodoti no kwizihiza yubile y’abapadiri barimo n’abajonosideri bahamijwe n’Inkiko

Yisangize Inshuti.

Ibitekerezo 5

  1. Ubundi umuntu yarakwiye kwisabira imbabazi Urugero nkange papa yarishe ariko sinzi icyabimuteye none ntacyinariho none nzasaba imabazi mucyimbocye gute ? murumva atarakarengane murakoze nukubyigaho.

  2. Ubundi umuntu yarakwiye kwisabira imbabazi Urugero nkange papa yarishe ariko sinzi icyabimuteye none ntacyinariho none nzasaba imabazi mucyimbocye gute ? murumva atarakarengane murakoze nukubyigaho.

  3. erega icyaha ni gatozi kbs hari abitwa ba ngeze hasani bari muri kangura kuki batitirirwa islam hari nabandi benshi bo mumadini atandukanye kuki ntawubyitirira amadini bakomokamo kbs nko mubiryogo interahamwe zingahe zari abasira igitwe interahamwe zingahe zari abadive mwebwe muge mureka kwishyiramo idini runaka gusa uwakoze wese amakosa azayahanirwe ntawe byitiriwe kuko ntanuwari wamutumye mwizina rye

Tanga Igitekerezo