Uko ugira amafaranga menshi niko kuguhana biruhanya-Ingabire Immacullee

Umuyobozi w’umuryango urwanya ruswa n’akarengane mu Rwanda ( Transparancy international Rwanda, TIR) Ingabire Marie Immacule avuga ko kuba urwego rw’Umuvunyi rwarasohoye urutonde rw’abahamijwe kurya ruswa rurimo abayobozi bato gusa ngo ntibivuze ko hejuru mu nzego nkuru hatari ruswa ahubwo ngo bo bazi kwirengera.

Mu minsi ishize urwego rw’Umuvunyi rwasohoye urutonde rw’abayobozi n’abandi bantu bahamijwe icyaha cyo kurya ruswa ndetse n’ingano y’amafaranga ya ruswa bakiriye.

Uru rutonde rwiganjemo abayobozi bo mu nzego z’ibanze, nta n’umwe wo ku rwego rwo hejuru nko muri Minisiteri cyangwa ibigo bya Leta ururiho.

Uru rutonde rugizwe n’abantu 987 bahamijwe ibyaha bya ruswa kuva mu mwaka wa 2010 kugeza ubu, uwahamijwe ruswa nii yari umuyobozi w’Umurenge wahamijwe kunyereza asaga miliyoni 40 z’amanyarwanda.

Mu kiganiro na Ingabire Marie Imaculle, yavuze ko kuba urwo rutonde rutagaragaraho abantu bakomeye ari uko bazi kwikingira.

Ati "Hari abantu boroshye gufata n’abandi biba biruhije. Uko ugenda uzamuka hejuru niko amafaranga agenda aba menshi uko aba menshi niko n’uyafata abyitwararika akabishyiramo icyo twakwita nk’ubushishozi bwo kwirengera kugirango asibanganye ibimenyetso.”

Ikindi kandi ngo ni uko no mu nkiko n’ubugenzacyaha naho hari ruswa ati "..Ntugomba kwibagirwa ko no mu bushinjacyaha ruswa iba irimo no mu bugenzacyaha no mu nkiko ndetse hose iriyo, uko rero uba ufite menshi niko guhanwa bigenda biruhanya. Burya uko ruswa igenda izamuka mu bwinshi niko kuyifata bigenda biruhanya.”

Ingabire Immaculle ashimangira ko ibi byose bitavuze ko hejuru hatari ruswa kuko n’imishinga y’iterambere idindira ngo biterwa na ruswa.

Ati "Ntabwo bivuze ko hejuru idahari, nonese iyo tubona imishinga minini igenda idindira, umushinga ukadindira igikorwa cyakamaze imyaka ibiri kikarangira hashize imyaka 5 cyangwa itandatu cyangwa rimwe na rimwe ntikinaboneke igisubizo cya nyuma kikaza kuba ngo umushinga wizwe nabi, ukabona n’uwo wawize nabi ntacyo bamubajije ubwo se uba ubona ibintu bipfa gupfa gusa?

Iyo ubona ibintu bidindira kandi ari n’imishinga ikomeye yazanaga iterambere rikomeye ry’igihugu haba harimo ruswa .. yewe n’uko kudakurikirana uwabigizemo uruhare ni ruswa “

Mu bushakashatsi bwakozwe na TIR umwaka ushize bwagaragaje ko urwego rwa polisi arirwo ruza imbere mu kwaka ruswa mu Rwanda ku kigero cya 6.3 %, inzego z’ibanze ziza ku mwanya wa kabiri ku kigero cya 4.7%, urwego rw’ubutabera 3.7%, hakaza urwego rw’abikorera kuri 1.8%.

Yisangize Inshuti.

Ibitekerezo

Tanga Igitekerezo