Hagiye gushyirwaho uburyo bushya bwo kwishyuza abambura Leta bitwaje ko nta bwishyu

Umukozi ushinzwe serivisi z’ amategeko muri Minisiteri y’ ubutabera, akaba n’ umwe mu bunganira Leta mu nkiko igihe yarezwe cyangwa yareze, Theophile Mbonera, avuga ko harimo gutegurwa uburyo bushya bwo kwishyuza ababereyemo imyenda Leta babuze ubwishyu cyangwa abitwaza ko nta bushobozi bafite bakanga kwishyura.

Mu kiganiro yagiranye na Makuruki.rw, Mbonera yavuze ko hari abantu Leta itsinda mu manza ntibishyure bavuga ko badafite ubushobozi bigatuma Leta ibihomberamo. Avuga ko hari gutekerezwa uburyo ababuze ubwishyu babereyemo Leta bajya bakora imirimo y’ amaboko mu rwego rwo kwishyura uwo mwenda.

Yagize ati: “Hari bake batishyura Leta bakavuga ko nta bushobozi bafite, aha na ho harimo gutekerezwa uburyo umuntu wabuze ubwishyu yajya akora imirimo y’ amaboko.”

Uyu muyobozi avuga ko bishoboka ko umuntu yabura ubwishyu ariko akaba afite imbaraga kuburyo yakora imirimo y’ amaboko ifitiye igihugu akamaro mu buryo bwenda gusa nk’imirimo nsimburagifungo TIG (Travaux d’ interet general) yakorwaga n’ababaga bahamwe n’icyaha cya Jenoside.

Minisiteri y’ ubutabera igaragaraza ko umubare w’ imanza Leta yatsindwaga zagabanyutse cyane gusa ngo haracyagaragara icyuho mu kugaruza ibyo Leta yatsindiye aho muri miliyoni zisaga 800 iyi minisiteri yagombaga kugaruza muri 2015, gusa ubu imaze kugaruza ibihumbi 210 gusa.

Nk’ uko imibare ibigaragaza, imanza Leta itsinda zavuye kuri 30% zigera kuri 70%. Iyi Minisiteri ikavuga ko ifite intego yo kongera umubare w’ imanza itsinda ku kigero cy’100%.

Yisangize Inshuti.

Ibitekerezo

Tanga Igitekerezo