Bene Rwigara n’umubyeyi wabo bahakanye ibyo baregwa banatanga imbogamizi urubanza rurasubikwa

Dianne Shima Rwigara, Anne Rwigara n’umubyeyi wabo Adeline Mukangemanyi bongeye kugezwa imbere y’ubutabera ngo bakurikiranwe ku byaha baregwa ariko bose bahakaniye urukiko ko ibyo baregwa batabyemera.

Adeline yavuze ko ashaka undi mwunganizi bituma urubanza rusubikwa ku nshuro ya gatatu

Kuri uyu wa 11 Ukwakira nibwo Bene Rwigara (Anne na Dianne) ndetse n’umubyeyi wabo Adeline Mukangemanyi baburanye ifungwa n’ifungurwa ry’agateganyo. Urubnza rwaburanishijwe n’urukiko rwisumbuye rwa Nyarugenge. Me Pierre Celestin Buhu niwe wakomeje kunganira abaregwa.

Umucamanza yabanje gusomera abaregwa ibyaha baregwa birimo icyo gukoresha impapuro mpimbano kireba gusa Diaanne Rwigara, mu gihe bose (Diane, Anne na nyina Adeline) bahuriye ku cyaha bashinjwa cyo guteza imvururu muri rubanda. Ku rundi ruhande ariko Adeline Rwigara we yihariye icyaha cyo kubiba amacakubiri muri rubanda.

Umucamanza yababajije niba ibi byaha babyemera maze bose bavuga ko batemera ibyaha byose baregwa.

Abaregwa bakomeje kugaragaza inzitizi zirimo kuba batarabashije guhabwa kopi ya dosiye irimo ibyaha baregwa, ndetse Adeline Mukangemanyi we anavuga ko ashaka undi mwunganizi wihariye kuko abona ko Me Buhuru wenyine adashobora kuburana dosiye y’abaregwa bose kuko ari nini cyane kandi ngo ntibanabasha kuvugana n’umwavoka wabo neza kuko bamuhuriraho ari batatu.

Adeline yavuze ko ashaka kunganirwa na Me Gatera Gashabana anasaba urukiko kumuhesha amafaranga yo kumwishyura kuko ayo bari bafite yose kuri ubu yafatiriwe na polisi.

Me Buhuru na we yavuze ko hari ibyo atarasoma muri dosiye y’abakiriya be ndetse yongera gusaba ko urubanza rusubikwa akabanza kuyisoma yose. Abaregwa nabo bavuga ejo hashize ari babonye dosiye bityo ko batarabasha kumenya ibiyikubiyemo byose.

Umushinjacyaha yavuze ko mu gihe urubanza rwaba rwongeye gusubikwa byafatwa nko gukinisha urukiko.

Me Buhuru yongeyeho ko atahawe amajwi n’ubutumwa bwo kuri WhatsApp kandi ari bimwe mu bigize ibimenyetso bishinja abakiriya be, ikintu avuga ko nacyo ari imbogamizi mu iburana. Ikindi uyu munyamategeko yavuze ni uko urukiko rwakemerera Adeline guhabwa umwunganizi kuko abyifuza kandi bikaba biri mu burenganzira bwe.

Umushinjacyaha yavuze ko inzitizi Mukangemanyi afite z’uko ibyo aregwa ari byinshi ku buryo uyu mwunganizi atabunganira ari umwe, ari amananiza no gushaka gutinza urubanza.

Inteko iburanisha uru rubanza yiherereye ngo ifate imyanzuro ku nzitizi zagaragajwe n’abaregwa.

Nyuma yo kwiherera urukiko rwemeje ko urubanza rwongera gusubikwa rukazakomeza nyuma y’indi minsi ibiri ni ukuvuga tariki 13 Ukwakira 2017.

Umucamanza yavuze ko uyu mwanzuro ufashwe hashingiwe ku nzitizi yatanzwe na Adeline Rwigara wavuze ko ashaka undi mwunganizi kandi ngo uburenganzira bwo kunganirwa mu mategeko ni ntavogerwa.

Gusa amafaranga yasabye yo kwishyura umwunganizi mushya, urukiko rwavuze ko nta mwanzuru rwabifataho kuko urubanza rutarimo kuburanishwa mu mizi.

Yisangize Inshuti.

Ibitekerezo

Tanga Igitekerezo