Bamwe mu banyeshuli bangije ifoto ya Perezida Nkurunziza barekuwe

Amafoto ya Perezida Nkurunziza yanditswemo n’amakaramu

Abanyeshuli batanu muri barindwi bari bafunzwe bakekwaho kwangiza ifoto y’umukuru w’igihugu cy’u Burundi Perezida Pierre Nkurunziza basabiwe n’ubushinjacyaha bwo mu Burundi gufungurwa by’agateganyo bakajya baburana bari hanze.

Amakuru dukesha ikinyamakuru SABC aravuga ko umushinjacyaha w’u Burundi mu ntara ya Muramvya Leonard Manirakiza, yasabye ko harekurwa abanyeshuli batanu muri barindwi bo mu kigo cya Muramvya High School bari barafunzwe bazira gukekwaho gusibanganya ifoto ya Perezida Nkurunziza yari mu bitabo bigiragamo ku ishuli mu mezi atatu ashize.

Abahungu 3 n’abakobwa 2 barekuwe ku itegeko ry’umujinjacyaha gusa basabwa ko bazajya bakurikiranwa bari hanze kimwe no kuba bazajya bitaba urukiko buri uko bakenewe.

Aba banyeshuri biga mu mwaka wa munani n’uwa cyenda batawe muri yombi bakekwaho gusibanganya no kwandika mu ifoto y’umukuru w’igihugu cy’u Burundi Peresida Pierre Nkurunziza ndetse bakanamutuka.

N’ubwo umushinjacyaha yasabye ko abanyeshuli batanu barekurwa hasigayemo abandi babiri aribo Alexis Mugerowimana wayoboraga abandi banyeshuli na Parfait Irankunda bo bashinjwa ibyaha bikomeye birimo kuba baragize uruhare rukomeye mu kwigomeka ku butegetsi bakanahohotera abaturage.

Umunyamategeko wunganira aba banyeshuli yavuze ko we asanga iki kibazo baragifashe mu rwego rwa politiki kurusha uko bari ku gifata mu rwego rw’ubutabera.
Mu byumweru bitatu bishize nibwo urukiko rwa Bujumbura rwari mu ntara ya Muramvya rufata umwanzuro ko aba banyeshuli uko ari 7 bakomeza gufungwa by’agateganyo gusa mu cyumweru cyashize nibwo inteko nshingamategeko yasabye ko aba banyeshuli barekurwa nta zindi mpamvu shingiweho.

Yisangize Inshuti.

Ibitekerezo

Tanga Igitekerezo