Audio zishinja bene Rwigara na nyina zishobora kubyara ibyaha ku bandi bantu, zimwe zizumvwa mu muhezo

Kuri uyu wa mbere urubanza rwa Diane na Anne Rwigara na nyina ubabyara ari we Adeline Mukangemanyi rwakomeje banenga urukiko rubaburanisha kuba nta bubasha rufite rwo kubaburanisha, ubushinjacyaha bwasabye ko amajwi ashinja abaregwa yakumva mu muhezo kubera ko hari iperereza rigikomeje.

Nk’ibisanzwe aba baregwa uko ari batatu bageze ku rukuko rwisumbuye rwa Nyarugenge barinzwe bikomeye n’aba polisi. Baraburana ifungwa n’ifungurwa ry’agateganyo nyuma yo gusubikwa inshuro enye kubera imbogamizi zaturukaga ku ruhande rw’abaregwa.

Bamaze umwanya bari mu rukiko bategereje abacamanza ari nako baganira n’abunganizi babo.

Abacamanaza bakigera mu rukiko Me Buhuru na Me Gashabana bunganira abaregwa bahise bazamura inzitizi ko abakiriya babo baburanishwa n’urukiko rutabifitiye ubushobozi.

Bavuze ko ingingo ya 99 na 100 zivuga ko inkiko zoze zo mu Rwanda zifite ububasha bwo kuburanisha imanza z’ifungwa n’ifungurwa ry’agateganyo uretse urukiko rukuru n’urwa gisirikare. Kandi ukekwaho icyaha akaburanishirizwa ku rukiko ruri hafi y’aho uregwa afungiye.

Bashingiye kuri izo ngingo abunganira abaregwa bavuze ko uru rukiko rwisumbuye rwa Nyarugenge nta bubasha rufite rwo kuburanisha abaregwa kuko bafungiwe i Remera, bityo bakavuga ko bakagombye kuba baburanira mu rukiko rw’ibanze rwa Nyarugunga cyangwa urwa Kacyiru kuko ari rwo ruri hafio y’aho abaregwa bafungiye.

Anne na we yahise asaba ko amategeko yubahirizwa ngo kuko bafatiwe Kacyiru kuri CID batafatiwe iwabo mu rugo mu Kiyovu avuga ko ibyo bikwiye gutuma baburanishirizwa ku rukiko rwegereye aho bafatiwe.

Ababunganira bo bahise banavuga ko bitewe nuko amategeko atubahirijwe mu kuburanisha abaregwa bagomba no guhita barekurwa kuko bakiri abere.

Iyi nzitizi ariko ubushinjacyaha bwavuze ko idafite ishingiro ngo kuko igamije gutinza urubanza. Bwavuze ko abacamanza batanga uburenganzira urubanza rugatangira mu mizi.

Nyuma gato abacamanza bihereye maze batangaza ko urukiko rufite uburenganzira bwo kuburanisha uru rubanza.

Ubushinjacyaha bwahise buhabwa umwanya ngo bushinje abaregwa bwahise buvuga ko igice kimwe cy’uru rubanza cyabera mu muhezo kuko bufite audio (amajwi) 20 zishinja abaregwa kandi ko 8 muri zo zigiye hanze zagira ingaruka kubazivugwamo.

Ubushinjacayaha bwavuze ko hari abandi bantu bavugwa muri izi audio bagikorwaho iperereza bityo rikaba ryabangamirwa. Ubushinjcyaha bwahise bunasaba ko no kwiregura kuri izi audio byazaba mu muhezo ndetse n’abatangabuhamya ntibazavugwe amazina.

Ubushinjacayaha bwavuze ko abakekwa ubufatanyacyaha hamwe n’abaregwa bashobora kugirira nabi abatangabuhamya bari muri izi audio.

Abunganira abaregwa bahise bamaganira kuri izo audio bavuga ko batigeze bazumva ngo bityo ntizikwiye gukoreshwa mu rukiko ngo kuko bidakurikije amategeko.

Me Buhuru yavuze ko izo audio niba binabaye ko zunvwa mu muhezo zose uko ari 20 azakunvwa mu muhezo zose ntibibe kuri izo 8 gusa.

Gusa urukiko rwahise rutegeka ko izi audio zakunvwa mu rukiko hakuwemo 8 gusa ari nako byagenze 12 zumvishwa abari mu rukiko.

Ubushinjacyaha bwavuze ko icyaha cyo guteza imidugararo muri rubanda abaregwa ngo bagihuriyeho n’abandi bari mu Rwanda no hanze yarwo bakiri gukorwaho iperereza.

Ubushinjacyaha bwavuze ko abaregwa bose bahuriye ku cyaha cyokwandikira ikinyamakuru Jeune Afrique bavuga ko nyakwigendera Assinapol Rwigara yishwe na Leta kandi mbere bari barandikiye ikigo cy’ubwishingizi bavuga ko yazize impanuka.

Bimwe mu byo Adeline Mukangemanyi ashinjwa harimo kuvuga ko abayoboye Leta y’u Rwanda ari abicanyi, amabandi ndetse ngo yanoherereje amajwi uwitwa Mushaija amubwira ububi bw’Abatusi anabamwangisha. Adeline kandi yoherereje ijwi uwitwa Thabita amubwira umugambi w’abarwanya Leta harimo no kwandika inyandiko zibiba urwango.

Ubushinjacyaha bwagarutse ku magambo Mukangemanyi yavuze ubwo Polisi yajyaga kubafata iwabo aho yavuze ko abapolisi abicanyi, abadayimoni, interahanwe,..

Adeline ngo hari amajwi yoherereje abantu bari hanze y’igihugu avuga ko iki gihugu ari icy’abasazi ndetse ko hari Jenoside iri imbere aha.

Dianne Rwigara ashinjwa icyaha cyo guteza imvururu muri rubanda, ibi ngo bigaragarira mu magambo y’impuha yavugiye mu kiganiro n’abanyamakuru, aho ngo yavuze ko Abanyarwanda bahagurukira rimwe iyo bagiye kwica gusa. Hari kandi ngo amagambo yangisha Leta abaturage yavuze avuga ko hari abanyarwanda bicwa abandi bakanyerezwa, akanavuga ko abantu nta mazi nta n’amashanyarazi bafite.

Ubwo yashakishaga imikono y’abashyigikiye kandidatire yagombaga kumwemerera guhatanira kuba Perezida w’u Rwanda, Dianne aregwa kuba yarakoresheje inyandiko mpimbano akanagaragaza abamusinyiye kandi barapfuye abandi bataba mu Rwanda, hakaba n’abo yakaga imyirondoro ababwira ko azabashyira kuri Lisiti z’abatishoboye akabasinyira nk’abamushyigikiye batabizi.

Ku ruhande rwa Uwamahoro Anne Rwigara, we ngo ashinjwa kugambirira guteza imidugararo muri rubanda akoresheje koherereza abantu batandukanye ubutumwa bw’amajwi bwerekana urwango afitiye Leta aho yanavuze ko Leta y’u Rwanda ari system ya mafia. Uyu kandi na we akurikiranyweho kuvuga ko ise Assinapol Rwigara yishwe na Leta.


Abaregwa bose uko ari batatu

Yisangize Inshuti.

Ibitekerezo

Tanga Igitekerezo