Amagare yagenewe abunzi ngo yaheze mu biro by’imirenge

Minisiteri y’Ubutabera iravuga ko yahawe imfashanyo y’amagare yari kugenera abunzi bo mu turere twa Kayonza na Ngoma ariko ntagere ku bunzi kuva m’ Ukwakira 2015 bitewe nuko ngo yari make atari kubakwira bose.

Ni kenshi abunzi bagiye bataka gukora ingendo ndende bava mu ngo zabo bagiye gukemura ibibazo by’abaturage, bagaheraho basaba Leta ko yajya ibaha inyoroshyangendo.

Umuryango witwa ILC wageneye abunzi bo mu turere twa Kayonza na Ngoma amagare yo kubafasha mu ngendo bakora ariko ngo ayo magare abunzi ntibigeze bayahabwa ngo bayakoreshe nkuko byari biteganyijwe, ahubwo ngo yaheze mu bubiko bw’imirenge itandukanye yo muri utwo turere.

Umuyobozi muri Minisiteri y’Ubutabera ushinzwe Ubutabera bwa Rubanda akaba ari na we ushinzwe abunzi, Urujeni Martine, avuga ko icyatumye ayo magare atarahawe abo yari yagenewe ari uko ayo magare yari make bityo ngo akaba atari kubakwira.

Yagize ati “Umuryango wa ILC wari watanze amagare mu turere twa Ngoma na Kayonza, amagare ava mu turere ajya mu mirenge ariko ntiyagera ku bunzi kubera yuko ayari yatanzwe n’uwo muryango ntiyari ahagije, ryari igare rimwe kuri komite.”

Urujeni Martine avuga ko ayo magare yatanzwe ariko ntakoreshwe azaherwaho muri gahunda yindi igiye kuza aho abunzi bose bazahabwa amagare n’ubwo atagaragaza igihe ntarengwa bizaba byakorewe gusa akavuga ko isoko ryatanzwe biri mu nzira

Yagize ati “Tugiye gutanga andi magare akaba azatanganwa n’ayo, biri muri gahunda ntitwavuga ngo tuzayatanga umunsi uyu n’uyu ariko ibyerekeranye n’amasoko byaratanzwe byararangiye amagare ari mu nzira ubu dutegereje ko ahagera agatangira gutangwa.”

Aya magare azatangwa mu ntara ebyiri z’u Rwanda ariko umujyi wa Kigali wo nturi mu zizaherwaho kuko abunzi baho badakeneye gukoresha amagare nk’abo mu zindi ntara.

Uretse kuba abunzi bagiye guhabwa amagare, banasanzwe bahabwa ubundi bufasha burimo gutangirwa ubwisungane mu kwivuza n’abagize umuryango wabo 4 ndetse bakaba barahawe na telefone ngendanwa mu rwego rwo kuborohereza itumanaho.

Yisangize Inshuti.

Ibitekerezo

Tanga Igitekerezo