Adeline na Diane Rwigara bakatiwe gufungwa by’agateganyo barajurira, Anne we ararekuwe

Urukiko rwategetse ko Adeline na Diane Rwigara bakurikiranwa bafunze

Adeline na Diane Rwigara bajuririye icyemezo cy’Urukiko Rwisumbuye rwa Nyarugenge rwemeje ko bafungwa iminsi 30 y’agateganyo mu gihe iperereza ku byaha bakurikiranyweho rikomeje. Anne Rwigara we rwategetse ko ahita arekurwa kuko nta mpamvu zikomeye zituma akekwaho ibyaha yaregwaga.

Kuri uyu wa 23 Ukwakira 2017, nibwo urukiko rwisumbuye rwa Nyarugenge rwafashe umwanzuro ku ifungwa n’ifungurwa ry’agateganyo kuri Adeline Mukangemanyi, Uwamahoro Anne Rwigara na Nshimiyimana Diane Rwigara bamaze iminsi baburana ku byaha birimo kugambirira guteza imvururu muri rubanda,ivangura n’amacakubiri, gukora no gukoresha inyandiko mpimbano.

Mu iburanisha riheruka, abaregwa n’ababunganira bari bagaragaje ko ubushinjacyaha bwinjiye muri telefone z’abaregwa bugasoma ubutumwa bahererekanyije ku buryo bunyuranyije n’amategeko ariko urukiko kuri uyu wa mbere rwemeje ko kureba muri telefoni z’abaregwa nta tegeko byishe.

Ubucamanza bwemeje ko ibyo ubushinjacyaha bwakoze bitakwitwa kugenzura itumanaho bwanzura ko nta mategeko yishwe kuko ngo kwinjira mu butumwa bwamaze kugera kuwo bugenewe ntibifatwa nko kugenzura itumanaho. Byitwa kugenzura itumanaho iyo umuntu yumvirije ubutumwa buri gutambuka ako kanya hagati y’abantu babiri baganira.

Urukiko kandi mw’isesengura ry’amajwi n’ubutumwa bwa WhatsApp byasanzwe muri telefone za ba Rwigara ngo rwasanze harimo impamvu zikomeye zo guteza imvururu muri rubanda.

Adeline Mukangemanyi ukurikiranweho icyaha cy’ivangura no gukurura amacakubiri, icyaha ubushinjacyaha bumurega bushingiye ku magambo yabwiye abapolisi bagiye kubata muri yombi aho yabise abicanyi, interahamwe,...hakanashingirwa kubyo yavugiye kuri telefone avuga ko Abatutsi ari babi. Urukiko rwavuze ko ibi bigaragaza ko yakanguriraga abo bavuganaga kwanga abatutsi byashingirwaho ashinjwa ivangura n’amacakubiri.

Urukiko rwashingiye ku butumwa Mukangemanyi yoherereje Mukangarambe Xaverine aho yavuze ko Leta ari amabandi, n’ibyo yabwiye Tabitha Gwiza aho yavugaga ko abantu bakwiye kwamagana iyi Leta, ko icyayihirika cyose yagishyigikira, ibi nabyo byerekana umugambi mubisha.

Urukiko rwavuze ko ibyo kuvuga ko ibiganiro bagiranaga abo babiganiraga atari rubanda ngo nta gaciro bifite kuko ibyageze hanze y’umuryango biba byageze muri rubanda.

Kuri Anne Rwigara ushinjwa kugambirira guteza imvururu cyangwa imidugararo muri rubanda, kubera ibyo yabwiye Diane ngo ikiza ni uko yava mu gihugu, ngo urukiko rwasanze bitarageze kubantu benshi kuburyo byakitwa kugumura rubanda.

Ku bijyanye n’ibaruwa yandikiwe Jeune Afrique yitirirwaga Anne, urukiko rwavuze ko ntakibugararagaza kuko idasinye kandi ngo rwaranasuzumye rusanga inkuru yagaragaye kuri Jeune afrique yarakuwe kuri RFI.

Kuba Anne yaravuze ko Leta ari iy’aba Mafia ngo nabyo nta kigaragaza ko yashakaga guteza imvururu muri rubanda kuko ngo ubushinjacyaha ntibugaragaza ahandi byageze muri rubanda.

Kuri Diane Rwigara we ngo kuba yaravugiye mu kiganiro yagiranye n’abanyamakuru ko Abanyarwanda bahagurukira rimwe bagiye kwica gusa ngo ni impamvu ikomeye yashingirwaho mu kumukurikiranaho guteza imvururu muri rubanda.

Urukiko rwashingiye kuri raporo yavuye mu isuzuma rya Laboratwari igaragaza ko imikono Diane yatanze itandukanye n’iya ba nyirubwite avuga ko bamusinyiye, ndetse runashingira ku buhamya bwatanzwe n’abavuze ko batigeze basinyira Diane kandi we avuga ko bamusinyiye. Ruvuga ko ibi byerekana ko hari ibihamya cy’uko Diane yakoresheje inyandiko mpimbano.

Diane we avuga ko listi yatanze muri NEC yasanze numero z’indangamuntu ziriho zidasa n’iziri kuri listi ubushinjacyaha bukoresha bumushinja ndetse avuga ko abavuze ko batamusinyiye byatewe nuko batewe ubwoba bagasinya imikono badasanzwe basinya.

Kuri ibi, urukiko rwanzuye ko mu bimenyetso by’ubushinjacyaha harimo impamvu zikomeye zigize icyaha ruvuga ko ibyo kuba Diane avuga ko abatangabuhamya batewe ubwoba nta shingiro bifite.
.
Mu myanzuro ku ifungwa n’ifungurwa ry’agateganyo,
Urukiko rwanzuye ko hari impamvu zikomeye zituma Adeline Rwigara na Diane Rwigara bakekwaho ibyaha bakurikiranweho bihanishwa igifungo kiri hejuru y’imyaka ibiri ruhita rutegegaka ko bakurikiranwa bafunze iminsi 30 by’agataganyo.

Urukiko rwafashe uyu mwanzuro wo gufunga Adeline na Diane runashingiye ku kuba ibyaha bombi bakurikiranweho bikirimo gukorwaho iperereza ku bandi bantu, bityo ngo barekuwe byakwica iperereza.

. Urukiko rusanze nta mpamvu zigaragara mu bimenyetso bishinja Anne Rwigara rutegeka ko agomba guhita arekurwa.

Adeline Mukangemanyi na Diane Rwigara bahise bavuga ko batishimiye imikirize y’urubanza bavuga ko batemera ibyemezo by’Urukiko bahita bavuga ko bajuriye.


Urukiko rwategetse ko Anne Rwigara arekurwa

Yisangize Inshuti.

Ibitekerezo

Tanga Igitekerezo