Yinjiza agatubutse kubera gukoresha imbuga nkoranyambaga

Patycope ahabwa igihembo cy’umuntu ukoresha neza imbuga nkoranyambaga

Rukundo Patrick uzwi ku izina rya Patycope yemeza ko imbuga nkoranyambaga zidakwiye gukoreshwa mu kwishimisha gusa ahubwo abantu bakwiye kuzibyaza umusaruro bakorera amafaranga, kuko we byabashije kumurihira kaminuza ndetse akaba aninjiza amafaranga atari make.

Muri iki gihe Isi iri kugenda iterambere mu buryo budasanzwe mu itumanaho cyane cyane binyuze kuri interineti, abantu bakabasha kuganira aho bari hose barebana, igitekerezo cy’uri muri Amerika kikabonwa n’uri mu Rwanda akimara kugishyira ku mbuga nkoranyambaga, nk’uko bajya babivuga isi yabaye nk’umudugudu.

N’ubwo izi mbuga nkoranyambaga zidufasha gushyikirana no kuganira n’abandi bantu batari hafi yacu, zifashishwa mu kumenyakanisha ibikorwa bitandukanye cyane cyane iby’ubucurizi mu gihe nyirabyo ashaka ko bigera kuri benshi kandi mu gihe gito.

Ni muri urwo rwego Rukundo Patrick uzwi nka Patycope avuga ko amaze kugera kuri byinshi abikesha kwamamaza ibikorwa by’abashoramari batandukanye abicishije ku mbuga nkoranyambaga ze nka Twitter, Facebook na Instagram.

Yagize ati “imbuga nkoranyambaga nzikoresha nka business kandi birantunze, mfite kampani zitandukanye dukorana, nabashije kwiyishyurira kaminuza nta handi nkuye amafaranga.”

Rukundo Patric avuga ko ubu afite kampani ebyiri yagiranye nazo amasezerano y’umwaka ndetse akaba agenda abona n’ibindi biraka bitandukanye ku buryo mu kwezi kumwe yinjiza amafaranga ari hagati y’ibihumbi 300 na 500 kandi ngo ashobora kurenga bitewe n’uko iminsi imeze kandi yizeye ko mu minsi iri imbere biziyongera.

Yagize ati “ ubu hari kampani ebyiri twagiranye amasezerano y’umwaka kandi ngenda mbona ibiraka byo kwamamaza ibitaramo, utubari, amaduka y’imyenda, ku kwezi ninjiza amafaranga ari hagati y’ibihumbi 300 na 500 ntabariyemo ibiraka, urumva ko ashobora no kurenga.”

Ikintu akesha kuba atunzwe no gukoresha imbuga nkoranyambaga ngo ni ukwandika ubutumwa busobanutse bufite icyo bumariye abanyarwanda ari byo batumye abantu benshi batangira kumukurikira n’abashoramari bakamugana.

Rukundo Patrick agira inama urubyiruko n’abandi bantu bose bakoresha imbuga nkoranyambaga gukanguka bakazikoresha mu bintu bibafitiye inyungu aho gukomeza guta umwanya baganira gusa, bityo ngo byanafasha u Rwanda kumenyakanisha gahunda yo guteza imbere ibikorerwa mu Rwanda yiswe “Made In Rwanda.”

Rukundo Patrick ukoresha amazina ya Patycope ku mbuga nkoranyambaga afite abantu bamukurikira kuri Instagram bagera ku bihumbi 112, kuri Twitter ni 3800 naho kuri facebook bagera ku bihumbi 17.

Mu mwaka ushize 2016 yahawe igihembo nk’umuntu ukoresha imbuga nkoranyambaga abikunze kurusha abandi.

Yisangize Inshuti.

Ibitekerezo

Tanga Igitekerezo