Umushinga mugari wo kwagura ikigo cy’ubutore cya Nkumba uzatuma abahatorezwa bikuba kabiri

Rucagu Boniface, umuyobozi wa Komisiyo y’Igihugu y’Itorero ubwo yatozaga icyiciro cy’abanyamakuru

Mu mushinga w’ingengo y’imari y’umwaka wa 2017/2018 harimo amafaranga angana na Miliyari y’u Rwanda yo kwagura ikigo gitorezwamo umuco w’ubutore cya Nkumba, ibi ngo biri mu mushinga mugari wo kwagura iki kigo ku buryo abagitorezwamo bazikuba kabiri.

Ubwo Minisiiri w’Imari n’igenamigambi Amb Gatete Claver yagezaga ku Nteko ishinga amategeko ibikubiye mu mushinga w’ingengo y’imari ya 2017/2018, yavuze ko hari Miliyari y’amafaranga y’u Rwanda yagenewe kwagura ikigo gitorezwamo umuco w’ubutore cya Nkumba.

Mu kiganiro Makuruki iherutse kugirana n’Umuyobozi mukuru wa Komisiyo y’igihugu y’Itorero, Rucagu Boniface, yatubwiye ko aya mafaranga ari igice kimwe cy’ingengo y’imari igenewe umushinga mugari wo kwagura ikigo gitorezwamo umuco w’ubutore cya Nkumba kuko uwo mushinga ugenewe Miliyari eshatu azatangwa mu byiciro.

Mu bizakorwa mu kwagura iki kigo harimo Kubaka inzu zo kuraramo no kugura ibikoresho byo kuraraho (Ibitanda n’imifariso), kubaka icyumba cy’uburiro, kubaka icyumba kinini cyo gutorezamo intore cyakira intore 1000,kubaka ibiro by’abayobozi, ,kongera ibikoresho by’isuku.

Ubusanzwe kuri ubu ikigo cya Nkumba ntigishobora gutorezwamo abantu barenze Magana atanu (500) ariko nyuma yo kucyagura ngo hazajya hatorezwamo abagera ku gihumbi (1000). Ibi ngo bizorohera abashinzwe itorero gutegura uburyo bwo gutoza ibyiciro bifite abantu benshi.

Rucagu mu gusobanura ibi yagize ati: “Hari ubwo haba hari umutwe w’intore ufite abantu 1000, tukagomba kubatoza inshuro ebyiri cyangwa tukajya gutira ikigo cya Gabiro, tukajya gutira Nasho, i Gako, dutira ibigo by’abasirikare ariko bakatubwira bati nubwo mudutira natwe ibi bigo tuba tubikeneye kuko amahugurwa yabo ahoraho. Noneho rero icyo kibazo tukibwira Leta iracyumva nibwo yemeye gutanga amafaranga kugirango twagure ikigo cyacu cya Nkumba.”

Rucagu avuga ko Nyuma yo kubaka izo nyubako nshya, ngo ntabwo izari zisanzwe zihari zizasenywa ahubwo zizakomeza gukoreshwa indi mirimo ku buryo ngo binashoboka ko hazajya hatorezwa ibyiciro bigizwe n’abantu bake bikaba byanakorwa no mugihe hari abandi bari kuhatorezwa bari mu kindi cyiciro kandi ntibiteze ikibazo.

Rucagu ati: “Niba dufite itorero ry’abantu 1000 tugakenera ko hari abandi bantu 400 b’ikindi cyiciro baza kuhatorezwa, bashobora kubashyiramo bagatorezwa muri iriya sale ntoya (ihari ubu), abandi 1000 barimo gutorezwa muri sale nini (izubakwa), akaba ari ibyiciro bibiri bitandukanye bitozwa mu gihe kimwe, ni ukuvuga ngo turashaka kuhakomeza cyane. Ubwo rero Leta yabaye itanze Miliyari ariko ubundi bazatanga Miliyari eshatu.”

Ibi Rucagu avuga ko bizongera umusaruro w’itorero kuko bizoroshya uburyo bw’imitoreze bikanongera umubare w’abatozwa umuco w’ubutore bo mu byiciro bitandukanye.

Yisangize Inshuti.

Ibitekerezo

Tanga Igitekerezo