U Rwanda rwatumije ‘Smart EBMs’ zitandukanye n’izisanzwe zizafasha kongera imisoro

Imashini za EBM zatumijwe ngo zizaba zirusha izi zisanzwe ikoranabuhanga.

Mu rwego rwo kongera ingano y’imisoro yinjizwa mu isanduku y’igihugu, Leta y’u Rwanda yatumije EBMs zikoresha ikoranabuhanga rihanitse ku buryo zizajya zitanga amakuru yose yerekeye imitungo y’abaturage n’imisoro bagomba gusora. Ibi bizafasha mu guhangana n’abadasora kandi bakagombye gusora.

Ingengo y’imari ya 2017/2018 ingana na Miliyari 2,094.9 z’amafaranga y’u Rwanda.

Minisitiri w’imari n’igenamigambi Amb Gatete Claver yabwiye abagize inteko ishinga amategeko ko amafaranga ateganyijwe kwinjira ava imbere mu gihugu angana na Miliyari 1,375.4 z’amafaranga y’u Rwanda aribyo bingana na 66%. Akaba aziyongeraho agera kuri Miliyari 134.3 ugereranyije na Miliyari 1241.1 yari mu ngengo y’imari ivuguruye ya 2016/2017.

Muri aya mafaranga azava mu gihugu, azakomoka ku misoro ateganyijwe kugera kuri Miliyari 1,200.3 akaba aziyongeraho agera kuri Miliyari 118.9.

Gukusanya imisoro ni bumwe mu buryo bukomeye Leta ibonamo amafaranga akoreshwa mu ngengo y’imari aturutse imbere mu gihugu. Ni yo mpamvu umunsi ku munsi hashyirwaho ingamba zitandukanye mu kunoza uburyo bwo gusora.

Uburyo bushya mu kwishyuza imisoro.

Minisitiri Gatete yavuze ko bitewe nuko hari abantu bakomeje kwinangira kwishyura imisoro harimo kunozwa umushinga uzazana ubundi buryo bwo gukoresha itumanaho rishingiye ku ikoranabuhanga ku buryo bazamenya amakuru yose y’imitungo ya buri muntu n’ingano y’umusoro yakagombye kwishyura.

Ati: "ugiye kureba abantu batishyuraga uwo musoro ni benshi, amakuru rero arimo gukusanywa biri hafi kurangira tuzakoresha n’uburyo bw’ikoranabuhanga mu itumanaho kugirango noneho turebe ko twashyiraho n’uburyo bw’ikoranabuhanga bufasha.”

Yavuze ko u Rwanda rwatumije Smart EBMs zigera ku bihumbi 10 zizakemura ibibazo bijyanye no kutishyura imisoro.

Ati: “Izi smart EBMs zigiye kuza rero noneho zizaba zitandukanye na ziriya zisanzwe kuko zizajya ziduha amakuru, ahangaha turashaka ko umuntu wese yishyura umusoro. Ni sisiteme ishobora kuba yavuga iti wowe kanaka ufite imitungo ingana gutya na gutya iranditse tuzi ibijyanye n’iyo mitungo uko bigenda, dore umusoro wakabaye wishyura ni uyunguyu tukaba dufite ayo makuru, iyo udafite ayo amakuru y’ahantu hose mu turere twose tw’igihugu ahongaho biragoranye kugirango imisoro izatangwe. Ariko iyi sisiteme irimo gushyirwaho turabona ko izafasha. ”

Yavuze ko izi mashini zikoreshwa mu gutanga inyemezabuguzi (EBM) zatumijwe ari zo zikoreshwa mu bihugu byateye imbere kurusha u Rwanda kandi zigafasha ibigo bishinzwe imisoro kwishyuza imisoro yose yo mugihugu ku buryo bworoshye kandi n’abasora bakoroherwa na byo.

Mu ngengo y’imari ya 2016/2017, irimo kugana ku musozo, Minisitiri Gatete yavuze ko kugeza muri Werurwe uyu mwaka ingano y’umusoro wari uteganyijwe kwinjira mu ngengo y’imari ya 2016/2017 wari waramaze kurenga kuko umusoro wari umaze kungana na Miliyari 794.9 z’amafaranga y’u Rwanda mu gihe hari hitezwe kubona 790.1 bigaragara ko yarenzeho Miliyari 4.8.

Ibi biragaragaza ko gukoresha imashini zitanga inyemezabuguzi byongereye umubare w’imisoro yinjira, ibi kandi bigashimangira ko niharamuka hazanywe izo mashini zikoresha ikoranabuhanga ryisumbuyeho nta kabuza ko bizongera ingano y’imisoro biturutse ku gusoresha abatajyaga basora ntibimenyekane.

Yisangize Inshuti.

Ibitekerezo

Tanga Igitekerezo