RRA yategetse ko nta muturage uzongera gusoreshwa ajyanye imyaka n’amatungo ku isoko

2

Ikigo cy’imisoro n’amahoro (RRA) cyasabye ko imisoro yakwaga hamwe na hamwe abaturage bajyanye imyaka cyangwa amatungo yabo mu masoko ikurwaho, ngo kuko inyuranyije n’amategeko.

Ni kenshi hagiye havugwa abaturage bakwa amafaranga bakinjirana imyaka cyangwa amatungo yabo mu isoko.

Abaturage bavugaga ko akenshi bayakwa bataranagurisha cyangwa hakaba ubwo banatashye batagurishije, byongeye atari n’abacuruzi bahoraho muri ayo masoko.
Kuri uyu wa Kabiri , Richard Tusabe, Komiseri mukuru wa RRA yandikiye ibaruwa sosiyete ya Ngali Holdings Ltd ari nayo ifite isoko ryo gukusanya imisoro yeguriwe uturere, asaba kutongera kwaka imisoro abaturage bagiye mu isoko.

Iyi baruwa igaragaza ko kwaka iyo misoro binyuranyije n’amategeko, ngo kuko ubusanzwe abishyura iyo misoro ari abafite umwanya (ikibanza) bacururizamo mu isoko.

Ibaruwa igira iti “duhereye ku busabe bw’abaturage bo mu turere dutandukanye, basaba ko bakurirwaho amahoro bakwa bajyanye ibyo bejeje cyangwa amatungo mu masoko bikaba …turabamenyesha ko amahoro yishyurwa n’umuntu ufite aho akorera ubucuruzi mu isoko.Ni muri urwo rwego abaturage bazana imyaka , amatungo yabo baje kuyagurisha mu masoko abegereye ariko batayakoreramo, bakaranguza abasanzwe bakorera muri ayo masoko batishyuzwa amahoro yo mu isoko.”

RRA yavuze ko abo bireba barimo abakozi ba Ngali Holdings ndetse n’abayobozi b’inzego z’ibanze basabwa gukurikirana niba ayo mabwiriza yibahirizwa.

Gusoresha abaturage bajyanye imyaka yabo cyangwa amatungo mu isoko byagiye bigaragara mu turere nka Kamonyi, Kayonza n’ahandi.

Yisangize Inshuti.

Ibitekerezo 2

  1. turabashimira cyane iki cyari ikibazo gikomeye ndatanga nkurugero nko mwisoko ryinka ryaruhango umuturage ajyana inka yagurisha atagurisha akaba arasoreshejwe kd aba yavuye imuhira yabuze nayumunyu bituma benshi bagurisha kubiciro bidakwiriye kugirango babone umusoro wisoko .nakarengane rwose. nugukandamizwa

  2. iki kibazo cyari kimaze kwiganza henshi gusa dufite ubuyobozi bureba kure kandi burebera abaturage muri rusange

Tanga Igitekerezo