Nyaruguru: Bahanze amaso isoko mu kwiyamamaza kwa Perezida wa Repubulika

Abagore bibumbiye muri koperative Duharanire Imirire Myiza mu Karere ka Nyarugutu mu murenge wa Kibeho baravuga ko biteze isoko ry’ibikorwa byabo mu kwuyamamaza kwa Perezida wa Repubulika.

Iyi koperative bayihurijwemo kugirango bafashwe gutegura indyo yuzuye ku miryango yabo. Muri iyi koperative bahabwa amahugurwa yo gutegura indyo yuzuye ariko kandi banafashijwe kwihangira imirimo ituma babona amafaranga yo kubona ibiribwa.

Ibikorwa aba bagore bakora bibafasha kuzamura imibereho yabo ni ubudozi bw’imyenda.Bavuga ko imyenda badoda bayigurisha mu bigo by’amashuri yaba abanza ndetse n’ayisumbuye.

Mukabutera Beatrice umuyobozi w’iyi koperative avuga ko bagifite ikibazo cy’amasoko.

Aganira na Makuruki yagize ati:” ubundi ubu abakiriya dufite ni abana b’abanyeshuri ariko ni bacyeya, mudufashije mukadushakira amasoko mwaba mudufashije kuko twe gukora tumaze kubimenyera.”

Iki kibazo cy’amasoko macyeya kandi gishimangirwa na Mushimiyimana Colette umuganga ushinzwe ubuzima mu kigo nderabuzima cya Kibeho ari naho iyi koperative iherereye.

Ati :” ikibazo bafite ni icy’amasoko kuko ni nacyo gituma hari abacika intege ugasanga ntibaje buri munsi.”

Ubuyobozi bw’Akarere ka Nyaruguru nabwo buvuga ko iki koko ari ikibazo kibangamiye iyi koperative ikorera mu murenge wa Kibeho ndetse n’andi akora nka yo yo mu mirenge ya Muganza, Nyabimata na Ruheru.

Gusa bavuga ko bari kugishakira igisubizo kirimo kuganira n’ibigo by’amashuri ariko kandi ngo biringiye gushaka amasoko afatika mu iyamamaza rya Perezida wa Repubulika nk’uko bivugwa na Karemera Athanase ushinzwe ubuzima mu karere.

Ati :”Twari twakoranye inama n’anashinzwe uburezi y’uko aho kugirango bage bajya kugurira ahandi ahubwo bajye bagurira muri izi koperative zatangiye iki gikorwa. Turanashaka no kureba ukuntu twakorana no muri kapanye ya nyakubahwa Perezida wa repubulika tugakorera abantu imipira kuburyo nayo bayikoresha aho kugirango bajye gukoresha I Kigali nibyo turimo ni ukugirango muri kampanye ya nyakubahwa Perezida wa repubulika naho tugire icyo tuvanamo .”

Iyi koperative ihuriyemo ababyeyi bahoze bafite abana bafite imirire mibi ikora imipira y’abanyeshuri bakuru, abakiri bato ndetse n’imyenda y’abana batoya cyane.

Abayihuriyemo bose bavuga ko baramutse babonye amasoko byababera isoko yo guteza imbere imiryango yabo ndete no kurandura burundu ikibazo cy’imirire mibi yakunze kuvugwa muri aka karere.

Yisangize Inshuti.

Ibitekerezo

Tanga Igitekerezo