Muri Nyakanga 2017, Ibiciro by’ibicuruzwa ku masoko byariyongereye

Raporo nshya y’ikigo cy’igihugu cy’ibarurishamibare mu Rwanda (NISR) yagaragaje ko ibiciro ku masoko yo mu Rwanda muri Nyakanga byazamutse cyane ugereranyije n’uko byari byifashe muri Nyakanga 2016.

Buri kwezi NISR ishyira ahagaragara igipimo cy’ihindagurika ry’ibiciro ku masoko. Mu kugaragaz auko ibiciro byahindaguritse mu kwezi gushize kwa Nyakanga 2017, NISR yabigereranyije n’uko ibiciro byari byifashe mu kwezi kwakubanjirije (Kamena 2017) kandi irongera inagereranya ibiciro byo muri Nyakanga 2017 n’ibyo muri Nyakanga 2016.

Raporo igaragaza uko ibiciro byahindaguritse ugereranyije Nyakanga 2017 na Nyakanda 2016, iragaragaza ko mu cyaro ari ho ibiciro byazamutse cyane ugereranyije no mu mijyi.

Ibiciro mu mijyi

Ibiciro mu mijyi byiyongereyeho 3,5% mu kwezi gushize kwa Nyakanga 2017 ugereranyije na Nyakanga 2016. Twakwibutsa ko ihinduka ry’ibiciro mu Rwanda mu kwezi kwa gatandatu (Kamena 2017) ryari ku kigereranyo kingana na 4,8% ugereranyije na Kamena 2016.

Bimwe mu byatumye ibiciro bizamukaho 3,5% mu kwezi kwa Nyakanga ni ibiciro by’ibiribwa n’ibinyobwa bidasembuye byazamutseho 6,9% n’ibiciro by’amazu, amazi, amashanyarazi, gazi n’ibindi bicanwa 1,8%.

Iyo ugereranyije Nyakanga 2017 na Nyakanga 2016, usanga ibiciro by’ibintu bitarimo ibiribwa n’ibikomoka ku ngufu byarazamutseho 3,6%.

Wagereranya ukwezi kwa Karindwi (Nyakanga 2017) n’ukwezi kwa gatandatu (Kamena 2017) ibiciro byagabanutseho 0.1%. Iri gabanuka rikaba ryaratewe n’ibiciro by’ibiribwa n’ibinyobwa bidasembuye byagabanutseho 0,5%.

Ibiciro mu byaro

Mu kwezi gushize kwa Nyakanga 2017 ibiciro mu byaro byiyongereyeho 10,5% ugereranyije na Nyakanga 2016. Twakwibutsa ko ihinduka ry’ibiciro mu byaro mu kwezi kwa gatandatu (Kamena 2017) ryari ku kigereranyo kingana na 11,8% ugereranyije na Kamena umwaka ushize.

Bimwe mu byatumye ibiciro bizamukaho 10,5% mu kwezi kwa Nyakanga ni ibiciro by’ibiribwa n’ibinyobwa bidasembuye byazamutseho 12,7% n’ibiciro by’ibijyanye n’uburezi byazamutseho 51,5%.

Iyo ugereranyije ukwezi kwa karindwi (Nyakanga 2017) n’ukwezi kwa gatandatu (Kamena 2017) ibiciro byiyongereyeho 0,1%. Iri zamuka ahanini ryatewe n’izamuka ry’ ibiciro by’amazu, amazi, amashanyarazi, gazi n’ibindi bicanwa 2,3%.

Ibiciro bikomatanyirijwe hamwe (mu mijyi no mu byaro)

Mu kwezi gushize kwa Nyakanga 2017 ibiciro mu Rwanda byiyongereyeho 8,1% ugereranyije na Nyakanga 2016. Twakwibutsa ko ibiciro mu Rwanda mu kwezi kwa gatandatu (Kamena 2017) byiyongereyeho 9,4%.

Bimwe mu byatumye ibiciro byiyongeraho 8,1% mu kwezi kwa karindwi 2017 ni ibiciro by’ibiribwa n’ibinyobwa bidasembuye byazamutseho 11,5%, ibiciro by’amazu, amazi, amashanyarazi, gazi n’ibindi bicanwa byazamutseho 3,5% n’ibiciro by’ibijyanye n’uburezi byazamutseho 23,4%.

Iyo ugereranyije ukwezi kwa karindwi (Nyakanga 2017) n’ukwezi kwa gatandatu (Kamena 2017) ibiciro ntibyahindutse.

Yisangize Inshuti.

Ibitekerezo

Tanga Igitekerezo