Mulindi Factory Tea yatanze inka umunani ku miryango itishoboye

Uruganda rw’icyayi rwa Mulindi ruherereye mu karere ka Gicumbi rwahaye inka umunani ku miryango itishoboye yo mu mirenge itandukanye ituriye uru ruganda.

Bantegeye Esperance umwe mu bahawe inka avuga ko yishimiye guhabwa inka n’uru ruganda akaba yatangaje ko yiteguye kubyaza umusaruro amahirwe yabonye.

Yagize ati: “Nishimye cyane kandi ndashimira uru ruganda rwampaye inka kuko nta bushobozi nagiraga bwo kuba nakwigurira inka, ubu ndahamya ko umusaruro ugiye kwiyongera kuko sinzongera kubura ifumbire kandi mu gihe gito ndaba mbonye amata.”

Dushime Alphonsine na we yaganiriye na Makuruki.rw, avuga ko atazongera kubura ifumbire, ashimira cyane Perezida Kagame washyizeho iyi gahunda ya Girinka none n’abanyamahanga bakaba bamaze kuyiga.

Yagize ati: “Njyewe ndashimira Kagame wazanye Girinka none reba aba baduhaye ni abanyakenya babyigiye kuri Kagame, iyo atazana iyi gahunda ntabwo mba mbonye iyi nka.”

Umuyobozi w’uruganda rwa Mulindi Benjamin Yego avuga ko bagize iki gitekerezo cyo gutanga inka bagikuye kuri gahunda ya Girinka yashyizweho na perezida Kagame kuko ngo basanze ari gahunda nziza ikura abantu mu bukene.

Yagize ati: “Twabonye iyi Gahunda ya Girinka ari nziza ifasha abatishoboye, twumva tugomba kuyunganira natwe tugatanga inka kugira ngo dufashe abatishoboye kwikura mu bukene.”

Uyu muyobozi akomeza avuga ko atari ubwa mbere bafasha abatishoboye kuko mu myaka ishize bagiye bafasha abacitse ku icumu rya Jenoside kandi ko bagenda bakora ibikorwa bitandukanye bifittiye abaturage akamaro.

Uruganda rw’icyayi rwa Mulindi rukigemura mu gihugu cy’Ubwongereza rukaba ruvuga ko abakiliya babo na bo basanze Girinka ari gahunda nziza bemera kujya bafatanya n’uru ruganda mu bikorwa byose byo gufasha abatishoboye.

Patrick Rurinda

Yisangize Inshuti.

Ibitekerezo

Tanga Igitekerezo