Mu mafoto, reba imyirondoro y’ingagi ziherutse kwitwa amazina

Kui itariki ya 1 Nzeri 2017, ni bwo mu karere ka Musanze habereye umuhango wo kwita amazina ingagi. Ni umuhango wari ubaye ku nshuro ya 13 aho ingagi 19 zikomoka mu miryango y’ingagi itandukanye zahawe amazina n’abantu batandukanye.

U Rwanda rukomeje kuzamura umubare w’ingagi rufite, kuko nko mu 2010 rwari ufite imiryango 9 y’ingagi, ubu igeze kuri 20.

Kuri iyi nshuro ya 13, umuhango wo kwita izina ingagi na wo waranzwe n’ubudasa kuko witabiriwe n’ibyamamare bitandukanye unitabirwa kandi na Perezida wa Repubulika y’u Rwanda Paul Kagame.

Mu byamamare byitabiriye uyu muhango harimo abashoramari bakomeye ku isi nka Howard Buffett, abakinnyi b’ama filime, abahanzi nka The Ben,abanyamideli nka Veronica.

Hari kandi n’abandi bantu bakoze udushya mu nzego zitandukanye nka Gisa w’imyaka 14 washushanyije inyubako ya Kigali Convantion Center na Radisson Blu Hotel.

Mu mazina yahawe izi ngagi harimo ashingiye kuri gahunda zo guteza imbere ubukerarugendo nka Temberurwanda, ajyanye n’igihe tugezemo nka Ikoranabuhanga, Ubudasa,

Andi mazina ashingiye cyane cyane ku kurata ubutwari bw’ingagi nka Mutware, Iyamarere, Iyambere, Mudahinyuka. Uku kwitwara nk’abatware kw’ingagi kwanagarutsweho na Perezida Kagame aho yavuze ko iyo ingagi ziri aho ziba ziba ari abatware kuko ziba ziyumvamo ubutware.

Hari n’amazina arata akamaro k’ingagi nka Inkingi, Iriba. Aya mazina ashimangirwa n’uburyo ingagi zisigaye iri inkingi y’ubukire n’iterambere ry’u Rwanda zikaba n’iriba ry’amadevize ahindura ubuzima n’ubukungu bw’igihugu. Ibi abaturiye izi ngagi babizi cyane.

Harimo kandi n’amazina arata ubwiza bw’ingagi nka Ubwiza, Inkesha, Inyange,Uruyange, Isuku, Imirasire. Umubare w’abasura ingagi ku mwaka n’uburyo igiciro cyo kuzisura gihanitse cyane byerekana ko ingagi ari nziza kuko zibaye nta bwiza zifite byaba bigoye ko umuntu atanga Amadorali 1,500 yo kuzireba.

Hari n’andi mazina agamije kwishimira ingagi no kuziha ikaze ku isi nka Arakaza, Nsanganira, Urungano,Macibiri. Aya mazina agamije kwishimira ko umuryango w’inagi ukomeje kwaguka mu Rwanda. Uku kuziha ikaze byerekana uguha ikaze ubukungu buzishingiyeho.

Dore amafoto y’izi ngagi n’imyirondoro yazo


Iyi ngagi yitwa Ikoranabuhanga, ikomoka mu muryango w’Agashya nyina akitwa Intango yavutse kuwa 29 Ukuboza 2016 uwayise iri zina ni Hon. Laurent Lamothe.


Iyi yo yitwa Arakaza, ikomoka mu muryango wo Kuryama, nyina yitwa Mahirwe, yavutse kuwa 01 Mata 2016, uwayihaye izina ni Dr. Winnie Kiiru.


Iyi izina ryayo ni Imirasire, ni iyo mu muryango wa Isimbi nyina ikitwa Ubumwe, yavutse taliki 4 Nzeri 2016, uwayihaye izina ni Justin Stevens.

Iyi ni Inkesha na yo ikomoka mu muryango wa Agashya, nyina ni Turiho, yavutse kuwa 30 Nyakanga 2016, uwayihaye iri zina ni Patience Ozokwor.


Inkingi, ikomoka mu muryango wa Hirwa, nyina yitwa Umoja (Ubumwe), yavutse tariki 13 Nyakanga 2016, Joe MacDonald ni we wayise izina.


Inyange, iyi ikomoka mu muryango wa Susa nyina akitwa Ingufu, yo yavutse kuwa 14 Nzeri 2016, uwayise ni Dr Olivier Nsengimana


IRIBA, ikomoka mu muryango wa Muhoza, uwayihaye izina yitwa Dr. Nyinawamwiza Laetitia

Iyi ni ISUKU yo mu muryango wa Isimbi, nyina ni Ejoheza, yavutse kuwa 02 Werurwe 2017, Dr. Eberhard Fischer ni we wayise izina.


IYAMARERE, ikomoka mu muryango witwa Ntambara, nyina ni Tegereza, yavutse 01 Werurwe 2017, ihabwa izina na Chloe Bello

UBUDASA ikomoka mu muryango wa Iyambere, nyina ni Tamu, yavutse kuwa 08 Nzeri2016, Andrew Muir niwe wayise izina.


MACIBIRI ikomoka mu muryango waTitus, nyina ni Kurudi, yavutse kuwa 04 Kanama 2016, ihabwa izina na Dr. Tara Stoinski.

MARAMBO ni iyo mu muryango wa UMUHOZA, uwayise izina ni Graham Ledger

Iyi ni MUDAHINYUKA ikomoka mu muryango wa Amahoro na ho uwayise izina akitwa Jean Kayihura

Iyi ngagi yo yitwa NSANGANIRA, na yo ni iyo mu muryango wa Ntambara, uwayise izina ni Thomas Schaefer


Iyi ifite izina rya TEMBERURWANDA, ni iyo mu muryango wa Muhoza, yabyawe na Inkubito ku itariki 02 Ukwakira 2016 ihabwa izina na Greg Bakunzi

Iyi yo ifite izina rya UBWIZA, na yo ikomoka mu muryango wa Muhoza, ikaba yarahawe izina na Veronika Vařeková

Iyi yitwa UMUTWARE, ni iyo mu muryango wa Mafunzo, yabyawe na Ukuri kuwa 07 Kanama 2016, ihabwa izina n’icyamamare Howard Buffett

Iyi yiswe RUNGANO, ikomoka mu muryango wo kwa Musirikari nyina akitwa Rugira, yabonye izuba kuitariki 23 Kamena 2017, Gisa Gakwisi wayise izina ni we mwana muto wagize amahirwe yo kwita izina ingagi ku myaka ye 14 y’amavuko.

Iyi yitwa URUYANGE, umuryo wayo witwa Pablo, nyina ikitwa Mitimbili, 24 Mata 2017 nibwo Uruyange rwabonye izuba maze icyamamare muri muzika nyarwanda The Ben aba ari we uyita iryo zina.

Amafoto: Kwita Izina

Yisangize Inshuti.

Ibitekerezo

Tanga Igitekerezo