Mu bantu 2000 Umujyi wa Kigali wahuje n’abatanga akazi, abasaga 800 barakabonye

Ku nshuro ya kane Umujyi wa Kigali ubinyujije mu kigo gifasha urubyiruko kubona akazi cya Kigali Employment Services Center ku bufatanye na Minisiteri y’Abakozi ba Leta n’Umurimo bakoze igikorwa cyo guhuza abakeneye akazi n’abagatanga mu rwego rwo kugabanya ubushomeri.

Muri iki gikorwa cyizwi nka Job net Lina buri mwaka,abakeneye akazi bahura n’abagatanga bakaganira, bakerekana ibyo bashoboye, abakoresha bashima bakabaha akazi bitewe n’abo bakeneye.

Umuyobozi w’Umujyi wa Kigali wungirije Ushinzwe Imibereho Myiza y’Abaturage, Muhongerwa Patricie avuga ko iki kigo cya Kigali Employment Services Center yavuze ko iki kigo kimaze kugira uruhare mu gushakira akazi urubyiruko rwo mu mujyi wa Kigali, aho abagera kuri 841 babonye akazi.

Yagize ati “kuva dutangiye dufite abantu barenga 2000 batugannye ariko abamaze kubona akazi uyu munsi ni abantu baera kuri 841.”

Umuyobozi w’Umujyi wa Kigali Wungirije Ushinzwe Imibereho Myiza y’Abaturage yongeyeho ko muri abo bantu bamaze kubona akazi harimo abagera kuri 209 babonye imirimo ihoraho, 393 bafite imiromo idahoraho, 140 bafashijwe kubona uburyo bwo kwimenyereza kubona akazi naho 99 bihangiye imirimo.

Uretse kuba Umujyi wa Kigali ufasha urubyiruko kubona imirimo, ku bufatanye n’izindi nzego za leta banatanga inyigisho zifasha urubyiruko kwihangira imirimo ari nabyo byatumye mu 2000 bamaze kuhanyura 99 bihangiye imirimo.

Visi meya Muhongerwa Patricie ati “ mu bijyanye no kwihangira imirimo dukorana na MINEACOM abakozi bayo baraza bakabangurira kwishyira hamwe no kuba bakwikorera imirimo yabo , iyo tubonye byabaye turishima.”

Umunyamabanga Uhoraho muri Minisiteri y’Abakozi ba Leta yavuze ko iki gikorwa ari ingirakamaro kuko gifasha abakeneye akazi kukabona cyangwa se bakabona amakuru, kandi kigafasha n’abakoresha kubona abakozi bitabasabye gukoresha ibizami no gutanga amatangazo.

Yongeyeho ko hari gahunda yo gushinga ibindi bigo bifasha urubyiruko kubona akazi nyuma y’icashinzwe mu karere Musanze

Kugeza ubu hari ibigo bijya gushaka abakozi muri Kigali Employement Services Center , kubera ko abahigishirizwa baba barahawe ubumenyi butandukanye bubafasha gukora akazi neza bagatanga umusaruro.

Mu mwaka ushize wa 2016 ababonye imirimo binyuze muri Job Net baragera kuri 120, kuri ubu ikaba yitabiriwe n’abashaka akazi 800 ndetse n’abagatanga 60.

Abakozi b’ibigo bishaka abakozi basobanurira abashaka akazi

Yisangize Inshuti.

Ibitekerezo

Tanga Igitekerezo