Milliyari hagati ya 36 na 49 z’amadorali zikenewe buri mwaka mu buhinzi bw’amashyamba

Raporo ya FAO iragaragaza ko hakenewe Milliyari hagati ya 36 na 49 z’amadorali ya America buri mwaka kugirango ibikorwa byo kwita ku buhinzi bw’amashyamba no gutunganya ubutaka bigende neza.

Kuva ku itariki ya 16 kugeza 17 Gicurasi 2017 i Kigali hateraniye inama mpuzamahanga izamara iminsi ibiri. Iyi nama irimo ishami ry’umuryango w’abibumbye ryita ku biribwa n’ubuhinzi (FAO) Minisiteri y’umutungo kamere mu Rwanda ndetse n’abandi bahagarariye ibigo bitandukanye ku isi hose bifite aho bihuriye n’ubuhinzi.

Iyi nama ahanini igamije kurebera hamwe uko ubuhinzi bw’amashyamba bwarushaho gushorwamo imari bukarushaho gutanga umusaruro. Hari kureberwamo muri rusange kandi uko ibidukikijije byarushaho kwitabwaho.

Ubushakashatsi bw’ikigo FAO bugaragaza muri raporo yayo ko hakiri inzira ndende cyane cyane kubera ikibazo cy’amikoro kugirango umusaruro uva mu buhinzi bw’amashyamba ubashe kugera ku rwego rushimishije

Guhanga udushya bizafasha mu iterambere rya Afurika.
Umuyobozi w’ihuriro Nyafurika rishinzwe guteza imbere ishoramari mu buhinzi rifite ikicaro muri Ghana (AAIN) Dr Alexis Ariho yavuze ko guhanga udushya ari kimwe mu bizafasha guteza imbere Afurika binyuze mu buhinzi bw’amashyamba. Ati: “Ikintu kizazamura iterambere rya Afurika ni uguhanga udushya muri ubu buhinzi.”

Ibi uyu muyobozi yabivuze agaragaza uburyo za Leta zisabwa gufasha urubyiruko guhanga udushya cyane cyane mu buhinzi, ahantu bamwe babona ko nta mahirwe y’ubukire ahari bigatuma badashoramo imari yabo.

Abikorera basabwe gutanga umusanzu wabo muri iyi gahunda yo kubyaza umusaruro ubuhinzi bw’amashyamba muri Afurika.

Raul Nshungu

Yisangize Inshuti.

Ibitekerezo

Tanga Igitekerezo